A Unión de Federacións Deportivas Galegas (UFEDEGA) realizou unha nova
xuntanza telemática coas Federacións, á cal asistiron máis de 25 representantes das mesmas. A reunión xirou en torno ao impulso ao deporte galego federado e seguro.
Alí presentouse a campaña de promoción do deporte federado galego, co lema “Organización, esforzo e unidade, paixón e resiliencia”, organizada pola UFEDEGA en colaboración coa Secretaría Xeral para o Deporte da Xunta de Galicia.
O obxectivo da promoción é poñer en valor todo o traballo realizado polo deporte galego durante a pandemia e impulsar a práctica deportiva federada, así como instar á sociedade a seguir apoiando ao deporte federado.
Con esta acción, a UFEDEGA que preside Rafael Louzán quere facer ver á sociedade que o deporte federado transmite valores como a superación, o esforzo, perseveranza, constancia e sobre todo o respecto e cumprimento das normas de seguridade.
A intención é que todas as Federacións Deportivas da nosa comunidade, clubs, deportistas e a sociedade en xeral compartan ou suban ás súas redes e ós grupos de whatsapp un vídeo e un cartel da campaña, acompañado do xa coñecido cancelo de #ForteCoDeporte.
Desde a organización inciden en que a COVID-19 está demostrando ser un virus difícil de vencer. Os seus continuos brotes e ondas dan mostra de que por moi agazapado que creamos que está, a súa capacidade de reaparecer segue sendo alta, a pesar de todo, o deporte federado galego segue traballando para que a práctica deportiva sexa o máis segura posible, a través do cumprimento duns estritos protocolos.
“Seguimos a traballar polo deporte na nosa comunidade, convencidos de que pronto volvera a
normalidade”, apuntan desde a UFEDEGA.
Ademais, na xuntanza tamén tratáronse asuntos relacionados coa actualidade federativa, entre eles a situación do convenio colectivo para traballadores das Federacións Deportivas Galegas e os dereitos audiovisuais nas competicións autonómicas, para o cal se contou co asesoramento de Rafael Alonso, experto en dereito deportivo.
