Boas novas para unha das grandes representantes do atletismo galego: Ana Peleteiro. Esta vez non veñen en forma de marca deportiva, nin de medalla. A triplista galega vén de facer público a través das súas redes sociais e as da súa parella, Benjamín Compaoré, que está embarazada de tres meses.
A atleta, bronce en triplo salto en Toquio 2020, está feliz tal e como amosa na súa conta de Instagram “a vida sorpréndenos co máis bonito e con aquelo que queremos e desexamos desde o primeiro día. Imos ser pais, dun bebé precios@, que nacerá rodead@ de moitísima xente que o vai amar e coidar. Estamos a vivir un soño”, explica a deportista.
Ver esta publicación en Instagram
Esta nova vai máis aló do deporte e entra no persoal, pero en As Nosas consideramos que é importante dalo a coñecer pola reflexión que leva aparellada respecto ao deporte e a maternidade.
A decisión de ser nai ou non, e de cando decicir selo, debera corresponder unicamente á persoa que asume esa decisión persoal (e no caso de habela, á súa parella). Non deberan influir nesa decisión aspectos do eido profesional sexa cal sexa a nosa profesión. Neste caso, non debera interferir na traxectoria deportiva dunha atleta.
Hai anos, Ana Peleteiro fixera precisamente público o acordo con Adidas, a marca que a patrocina, para que, chegado o caso, a súa decisión de ser nai non tivese repercusións no patrocinio que a firma ten con ela.
Deporte e maternidade
En As Nosas convidámos a que lle botedes un ollo a unha reportaxe que fixemos no seu día xustamente sobre este tema: deporte e maternidade. Falamos con tres deportistas e nais: Helen Roca, Lucía Nespereira e Rebeca Kruse. Elas narran desde a súa experiencia persoal tres xeitos diferentes de afrontar ese reto tan persoal e tan importante, con tres opcións distintas de facelo.
Consideramos que o importante é que sexa cada deportista quen decida ser, ou non nai, e cando decide facelo, sen que a súa carreira deportiva se vexa afectada e iso condicione a súa decisión.
Parece claro que na maternidade e o deporte, como no resto de sectores profesionais, non hai unha fórmula ‘correcta’ pola que apostar. Cada muller ten que poder tomar a decisión de continuar coa súa actividade deportiva (sexa ou non profesional) ou de pausala, en función das súas circunstancias persoais.
Elas deben poder decidir por si mesmas. Ana Peleteiro acaba de facelo así que os nosos parabéns pola nova: o que che fai feliz, fainos felices.
Rebeca Kruse: “Miñas fillas ven que a súa nai loita por facer algo que lle fai feliz”
Helen Roca: “A incerteza de se vas poder volver é o máis complicado de ser nai”