As xornadas “A terra, o balón mais elas”, organizadas polos Veteranos de Crendes e o CD Mabegondo chegan á súa fin este venres. 25 de xuño, ás 20:00 horas.
O evento, que conta coa colaboración do Concello de Abegondo, remata coas poñencias da fisioterapeuta do Dépor ABANCA Andrea Seijo, a futbolista Sara Pita e a traductora do RC Deportivo, Bibiana Santiso.
Tres puntos de vista para rematar ‘A terra, o balón mais elas” en Abegondo
“As mulleres levan sendo invisibles para a ciencia porque considerábase que os seus problemas eran similares aos do home e que, por tanto, era posible extrapolar os datos destes últimos”, recalcan desde a organización das xornadas.
O último evento do proxecto terá lugar no Salón Cultural de San Tirso e fará un apaixonado percorrido polos distintos recunchos da muller no mundo do fútbol.
Andrea Seijo falará da muller e as lesións no fútbol, Sara Pita sobre a maternidade no fútbol, e Bibiana Santiso presentará os resultados do “Plan Piloto Elas+Fútbol 8M2021″. O evento pecharase cunha mesa de traballo moderada por Lorena Pose (EnXogo) e coa participación das tres mulleres citadas e o público.
Para asistir, é necesario apuntarse nesta ligazón. Entre as asistentes estará a futbolista galega Miriam Ríos, que vén de renovar esta semana co UD Tacuense.
Coas actividades programadas para este venres remata a edición de ‘A terra, o balón mais elas’, que entre outras accións, achegou a Esther Sullastres, gardameta do Dépor ABANCA ao alumnado de Abegondo, en colaboración coa xornalista Sara Gallego.
Esther Sullastres responde ás preguntas dos escolares de Abegondo