O Barco de Valdeorras acolleu o 6 de xuño o Campionato Galego sub23, no que se citaron atletas dun prometedor futuro do atletismo galego. Neste torneo, o club do SG Pontevedra foi o protagonista, acadando seis medallas en categorías feminina (cinco ouros e un bronce).
Tamén participaron atletas doutros clubs como o CA Santiago (catro pratas e un ouro), CA Narón (tres bronces e un ouro), Atletismo Friol (dous ouros), entre outros.
Os metros lisos deixaron un reparto de podios
Na proba dos 100 metros lisos chegaría o primeiro ouro pontevedrés, da man de Cristina Garrido cunha marca de 12.32. Seguiuna en segunda posición Ana Iglesias, do Coruña Comarca e Paula López, do CA Narón. Na seguinte distancia, os 200 metros lisos, a atleta do club coruñés subiu á primeira posición, deixando a Miriam Otero, do Lugo Running na prata e a Paula López de novo co bronce.
Nos 400 metros lisos María Carballido, do Atletismo Friol, proclamouse campioa do Galego sub23. En segundo lugar rematou Miriam Otero, que sumou unha nova prata, e en terceiro Marina Prieto, do Atletismo Val Minor. E na seguinte proba, dos 800 metros, de novo o Friol obtivo a medalla de ouro grazas a Carballido. Finalmente, nos 1.500 metros lisos, o campionato foi para Sofía Castro, de La Mochila del Deporte, e a prata para Marta Fernández, do Atletismo Ribadeo.
Nos valos o Riazor Coruña sumou dúas pratas
Nos valos deste torneo Galego sub23, Lucía Ferrer, do SG Pontevedra, proclamouse campioa na distancia de cen metros, seguida por Ana Pajarrón, do Riazor Coruña. Nos 400 metros, Lucía Rivadulla, do Ría Ferrol, foi a primeira clasificada, seguida de novo pola coruñesa Pajarrón.
O resto de concursos do Campionato Galego sub23
No concurso de altura, Aloia Vilas superou o listón en 1,50 metros para colgarse a medalla de ouro, mentres que Verónica Arteche, do CA Santiago quedou na segunda posición. En pértega, a campioa foi Beatriz Viterl, do Alcampo Scorpio, e a subcampioa foi Andrea Botella, do CA Santiago. En lonxitude, Arteche acadou o ouro.
No lanzamento de peso de 4 quilogramos, Evelyn Fernández, do CA Narón, foi a mellor clasificada, seguida por Verónica Arteche, que repetiu na segunda posición. En disco de 1 kg, a campioa foi Claudia Puif, do SG Pontevedra, deixando a María Ezquerro, do CA Sada na praza de prata e a Evelyn Fernández na de bronce.
En martelo de 4 kg, Iria Filgueira, do SG Pontevedra, engadiu outro ouro ao palmarés pontevedrés, superando coa súa marca de 44.58m a María Sonsoles Quiroga, do LUCUS Caixa Rural. Por último, a proba de xavelina de 600g deixou como campioa a Ivanna Carolina Román, do Ría Ferrol, con Andrea Botella, do CA Santiago como segunda e Andrea González, do SG Pontevedra, como terceira.
Consulta aquí os resultados completos: do Campionato Galego sub23
