A Selección Española de baloncesto é unha das favoritas nos Xogos Olímpicos e así o está a demostrar. O combinado estatal, con Raquel Carrera e Tamara Abalde, sumou ante Serbia a súa segunda vitoria, cun 85-70.
Este triunfo serviu de desquite para as españolas, despois de ser eliminadas nos cuartos de final do EuroBasket precisamente ante as serbias.
A Selección invicta
O primeiro cuarto do encontro estivo moi igualado, con dous equipos de alto nivel dándoo todo no parqué nipón. Á fin deste tempo, o marcador anunciaba o 19-20 a favor das vixentes campioas de Europa.
No segundo parcial, as serbias seguían a supoñer unha ameaza para o progreso das españolas, que porén non baixaban os brazos. Os esforzos da Selección servían para manter preto ás rivais, pero Serbia vencía de tres no descanso.
Tras a reanudación, España saiu desconectada no ataque, mentres que Serbia demostraba o seu acerto exterior, mantendo unha importante vantaxe. Cando o marcador informaba do 43-52, as vermellas reaccionaron. Entre os puntos que marcaron a diferenza, estivo unha bandexa de Raquel Carrera.
No último cuarto, a tesón e o esforzo da Selección serviu para asinar a gran remontada. Malia que as serbias mantiñan un ritmo alto, as españolas foron superiores para rematar co 85-70.
Nesta ocasión, Tamara Abalde non xogou por decisión de Lucas Mondelo. Quen si o fixo foi Raquel Carrera, con 14:50 minutos na pista e anotando catro puntos.
O seguinte rival da Selección: Canadá
Con este resultado, as españolas da Selección chegan cun 2-0 e un +19 ao último partido da fase de grupos. Este celebrarase ás 03:00 horas do sábado, 31 de xullo, ante Canadá.
