A alcaldesa da Coruña, Inés Rey, presidiu esta mañá a presentación do partido España-Bélxica que se disputará o martes 16 de xullo ás 19.00 horas no estadio municipal de Riazor e que servirá de homenaxe ao Karbo. O acto tivo lugar no propio recinto que acollerá o encontro.
Como lembran desde a RFEF, “cando a Selección Española feminina de fútbol comezaba a abrirse paso, de forma oficial, no noso país, A Coruña era un dos polos máis importantes para nosas xogadoras. O Karbo, un equipo fundado nun colexio do barrio de dos Mallos, converteuse nunha referencia entre aquelas pioneiras, logrando catro títulos nacionais, equivalentes á Copa da Raíña, entre 1981 e 1985. Moitos anos despois, cun Mundial e unha Nations League nas vitrinas da Selección Española, A Coruña quere lembrar a esas mulleres que abriron camiño co España-Bélxica que se disputará o próximo 16 de xullo (19:00 horas) no estadio ABANCA-RIAZOR”.
Ademais da alcaldesa, Inés Rey, na presentación tamén participaron o concelleiro de Deportes, Manuel Vázquez, e o concelleiro de Cultura e Turismo, Gonzalo Castro, tamén interviñeron no acto o vicepresidente da Real Federación Española de Fútbol e presidente da Real Federación Galega de Fútbol, Rafael Louzán, o secretario xeral para o Deporte da Xunta de Galicia, José Ramón Lete, o deputado de Deportes da Deputación da Coruña, Antonio Leira, a conselleira do Real Club Deportivo, Michelle Clemente, e Inma Castañón, ex futbolista internacional e ex integrante do Karbo.
Presentado en A Coruña el ̃ – ́ del próximo 16 de julio
La ciudad gallega celebra la vuelta de la @sefutbolfem, vigente campeona del mundo
Entradas: https://t.co/E82MIUzYaA#JugarLucharYGanar | #WEURO2025 pic.twitter.com/Fj0qvufwch
— Selección Española Femenina de Fútbol (@SEFutbolFem) July 5, 2024
“A Coruña sempre foi unha cidade pioneira no fútbol feminino, comezando coa figura de Irene Gonzalez Basanta e continuando con aquel histórico Karbo e o noso querido Dépor ABANCA, que este 2024 volve á élite”, apuntou a alcaldesa na súa intervención.
Inés Rey rememorou o partido que enfrontou á Selección Española e Azerbaiyán en Riazor no ano 2019 e que supuxo o récord de asistencia nun encontro feminino no país. “Non se me ocorre mellor momento para recibir a segunda visita da selección, nun estadio que neste 2024 deunos moitas alegrías aos coruñeses e coruñesas”, sinalou a alcaldesa da Coruña.
A Selección Española regresará á cidade herculina como o mellor equipo do ránking FIFA e tras conseguir o Mundial 2023 e a Copa de Nacións 2024. Será o último partido de clasificación para a Eurocopa 2025, para a cal o equipo dirixido por Montse Tomé xa está clasificada e celebrarase dúas semanas antes do debut da selección feminina nos Xogos Olímpicos de París 2024. “Esperamos que A Coruña sexa talismán e a próxima visita de España a Riazor poidamos falar dunha selección campioa olímpica ou de Europa”, dixo Inés Rey.
Inma Castañón: “Oxalá o 16 vivamos unha festa”
A primeira capitá oficial da Selección Española feminina de fútbol foi Inma Castañón, ex futbolista do Karbo que tamén interveu durante o acto. Castañón lembrou que, cando era capitá, “o único que estaba a esperar era a calzarme as botas e saír ao campo; era unha emoción enorme”. “Oxalá o próximo día 16 vivamos unha gran festa neste estadio”, desexou esta pioneira do futfem estatal e galego.
Michelle Clemente, conselleira do RC Deportivo, que estivo acompañada por Kevin Cabado, responsable do Dépor ABANCA, deu a “benvida” ás campioas do mundo: “Estamos moi orgullosos e moi contentos de ter aquí á Selección Española feminina. En 2019 xa a tivemos aquí cunha asistencia récord. Agora repite con catro xogadoras que estiveron no Depor ABANCA. E como anfitrións que somos esperemos que sintades en casa. Como locais queremos a vitoria da selección española”.
🇪🇸 La @sefutbolfem volverá a jugar en A Coruña y Riazor acogió el acto de presentación.
📹 Así transcurrió la jornada en la ciudad gallega.#JugarLucharYGanar | #WEURO2025 pic.twitter.com/Km6hjC5ced
— Selección Española Femenina de Fútbol (@SEFutbolFem) July 5, 2024
Desde a Deputación provincial da Coruña, Antonio Leira puxo á Selección Española como exemplo de que “os soños, cando se perseguen con humildade, conséguense; e esta é unha lección e un referente tamén para a nosa Deputación en materia deportiva”. Cualificou como “unha festa do deporte” o día 16 de xullo: “é un partido para gozar”.
Onde mercar as entradas para ver á Selección Española?
As entradas para o partido, que se puxeron á venda este venres, terán un prezo de 10 a 15 euros e contarán con descontos especiais de ata un 20% para as persoas que as merquen entre este venres e o próximo martes, 9 de xullo. Poderán adquirirse unicamente a través de tickets.rfef.es.
Haberá entradas especiais para persoas con mobilidade reducida a un prezo de 10 euros que inclúe tamén o pase dunha persoa acompañante.
Narración para persoas cegas, exposición no Obelisco e Fan Zone
A alcaldesa da Coruña, Inés Rey, celebrou que este encontro conte co sistema de narración para persoas cegas ideado polo coruñés Jesús Suárez co apoio do Concello da Coruña e que a RFEF incorporou para os seus partidos.
Por outra banda, tal e como anunciou a alcaldesa, desde o luns 8 ao domingo 14 haberá unha exposición fotográfica da historia da Selección Española feminina na contorna do Obelisco.
Ademais, durante o venres 12 e sábado 13 instalarase na explanada do Palacio dos Deportes unha zona fan con actividades para todas as idades. “Animo á cidadanía a asistir en masa a este encontro e superar as máis de 10.000 persoas que viviron a primeira visita de España á nosa cidade”, concluíu Inés Rey.
Lete Lasa destaca a puxanza do fútbol galego
O secretario xeral para o Deporte, José Ramón Lete Lasa, foi outra das persoas que participou na presentación deste partido de fútbol entre as seleccións absolutas femininas de España e Bélxica clasificatorio para a Eurocopa de 2025.
O mandatario galego destacou a “puxanza do fútbol galego que pon de manifesto o papel protagonista dos futbolistas da nosa terra nas seleccións nacionais como Tere Abelleira, que vén de ser convocada por Montse Tomé para a a participación nos Xogos de París, ou Joselu Mato, que esta mesma tarde xoga os cuartos de final do Europeo masculino”.
Lete Lasa centrou o foco no fútbol feminino e na lista de xogadoras galegas de gran importancia para o fútbol de todo o país como foron Mari Paz Vilas, que foi quen de marcar nun partido coa Selección Española ata sete goles e é a máxima goleadora histórica do Valencia; Vero Boquete, a primeira muller española en gañar a Champions League e que lle dá nome ao estadio de Santiago; ou Nuria Rábano, campioa da Champions League co Barcelona en 2023.
O secretario xeral para o Deporte lembrou que “no pasado mes de decembro, Pontevedra xa acolleu un partido da Liga de Nacións da selección feminina” e que Riazor xa acolleu en 2019 un encontro da selección feminina clasificatorio para a Eurocopa de 2021. Agora repite acollendo este España-Bélxica que contará “cun acicate especial xa que será o primeiro partido oficial que se disputará desde que Riazor foi escollido definitivamente como sede para o Mundial de 2030”.
