Este verán será especial para as compoñentes da Selección Española de baloncesto. As españolas xogarán do 17 ao 27 de xuño o EuroBasket, e as convocadas por Lucas Mondelo (entre as que están as galegas Raquel Carrera, Paula Ginzo e Tamara Abalde) terán seis partidos de preparación.
A xira destes duelos amigables poderá seguirse a través de Teledeporte, e enfrontará ás internacionais con Francia, Nigeria, Bélxica, Turquía e Italia. As sesións de traballo da Selección comezarán en L’Alqueria de Valencia, antes de por rumbo a Toulouse, onde enfrontarase por partida dobre ás galas. O primeiro partido será o domingo, 23 de maio, ás 17:45 horas, mentres que o segundo será o luns, 24 de maio, ás 16:05 horas.
Despois, as de Mondelo regresarán a España. O seu primeiro destino será Córdoba, na estrea das vermellas na cidade andaluza. O Palacio Municipal de Deportes Vista Alegre acollerá o triangular con Nigeria e Bélxica. O primeiro duelo terá lugar o xoves, 3 de xuño, ás 21:00 horas, mentres que o segundo será o sábado, 5 de xuño, ás 18:45 horas.
Valencia será a seguinte sede, como tamén o fará nos dous dos catro grupos da primeira fase e da fase final do Eurobasket. O novo triangular ante Turquía e Italia terá lugar o xoves 10, ás 20:30 horas, e o sábado 12, ás 20:30 horas, respectivamente.
A competición europea comezará oficialmente para a Selección Española o xoves, 17 de xuño, ás 21:00 horas cun encontro ante Bielorrusia. A seguirán Suecia, o venres 18, e Eslovaquia, o domingo 20.
A presentación oficial da Selección
Antes de partir a Valencia para iniciar os adestramentos, a Selección Española foi presentada na sede de Endesa en Madrid. Ao acto acudiu o plantel ao completo do combinado estatal, así como o ministro de Cultura y Deportes, José Manuel Rodríguez Uribes; o presidente da FEB, Jorge Garbajosa; a vicealcaldesa do Ayuntamiento de Madrid, Begoña Villacís; e o director xeral de Comunicación de Endesa, Ignacio Jiménez. Durante a cerimonia presentouse o programa Basket Girlz, un proxecto de Endesa que buscará analizar as causas do abandono das xogadoras antes de tempo.
Na presentación, o seleccionador español Lucas Mondelo admitiu a dificultade á hora de elaborar a lista de convocadas, pero o ve como algo positivo xa que “é bo para o baloncesto feminino español”. Así mesmo, asegurou que neste equipo, con xogadoras como Raquel Carrera, Paula Ginzo ou Tamara Abalde, “vemos o presente, pero tamén hai moito futuro” no baloncesto español.
Este verán chega cun dobre reto para a Selección, co EuroBasket e os Xogos Olímpicos, pero o adestrador asegura que o conxunto está preparado fisicamente. O que haberá que traballar é ” a mente”, co obxectiv o de “convertir a historia en lenda e esa será a motivación”.
A capitá do combinado estatal, Laia Palau, declarou que “cos dous ouros consecutivos cumprimos coa historia. Xogamos en casa, temos moita ilusuón e loitaremos por chegar ao noso teito. Os resultados xa vendrán”. Pola súa banda, a xogadora Alba Torrens engadiu que “este é un ano especial, porque para min é volver á Selección. Ilusión é a palabra e o que nos move a todos. Imos dar o mellor dunha mesma e iso asegúranos competir”.
Pola súa banda, o presidente da FEB, declarou que “este campionato é especial, porque se xoga en casa, porque podemos conseguir outra medalla, pero sobre todo, por poder ter en época de pandemia ás referentes do baloncesto feminino español durante tres meses no escaparate, algo que é a mellor forma de dar visibilidade ao deporte que amamos. Tres meses de ilusión para desfrutar dun equipo que rachou os seus propios límites”.
Tamén tivo unhas palabras José Manuel Rodríguez Uribes, ministro de Cultura y Deportes, afirmando que “hai elementos para a esperanza, o primeiro é a vacinación, pero hai elementos cualitativos, e un motivo de volta á normalidade é apoiar á Selección Feminina nun novo reto na súa exitosa historia. Vós sodes agora un foco de luz nesta difícil situación de pandemia. O deporte é un dereito dos cidadáns, pero tamén é unha industria que xera riqueza. Sodes esa sorte de diplomacia brancaque os coñecen en todo o mundo”.
Finalmente, Begoña Villacís, vicealcaldesa de Madrid, tivo unha petición para as xogadoras: “Quero perdirvos que gañedes. Sei que tivechedes unha tempada moi dura. Son nai de tres fillas e non sabedes ata que punto fuchedes importantes para elas. Quero que nos momentos difíciles pensedes nesas mozas que fan deporte e que queremos que sigan facéndoo. Estamos orgullosas de vños e queremos que sexades referentes para esas mozas”.
Neste EuroBasket, a Selección defenderá o título logrado en Praga 2017 e revalidada en Belgrado 2019.
