A Selección Española de baloncesto, coa galega Raquel Carrera entre as súas filas, despide o EuroBasket cunha derrota ante Rusia. As vermellas xa non lograron o pase ás semifinais ao perder ante Serbia en cuartos, e finaliza o campionato perdendo ante as rusas cun 74-78.
Neste derradeiro duelo, o resultado estivo moi competido de principio a fin. As españolas xa non podían optar ao título, xógandose neste partido os postos entre o quinto e o oitavo e, máis importante aínda, a clasificación para o PreMundial.
Os pequenos detalles pasaron factura á Selección neste Eurobasket, no que as xogadoras españolas demostraron sobre a cancha o seu alto nivel competitivo, malia as dificultades ás que tiveron que facer fronte.
O paso de Carrera pola Selección no EuroBasket
Con Paula Ginzo fóra do listado final e Tamara Abalde en corentena tras dar positivo en COVID-19 a unha semana do europeo, a ourensá Raquel Carrera foi a única representación galega no combinado estatal.
Tamara Abalade xa está recuperada e retomará o traballlo coa Selección para os Xogos Olímpicos
Na primeira fase da competición, a Selección caeu derrotada por un 51-53 ante Bielorrusia, pero foi quen de vencer a Suecia por un 76-55 e a Eslovaquia cun 93-61, pasando así a cuartos de final. Aparecendo en momentos decisivos, Carrera rondou os 20 minutos en pista en cada duelo, anotando sete puntos.
Xa en oitavos, as españolas superaron a Montenegro, cun 78-51, con catro puntos da ourensá, quen fixo un pleno de tiros libres, catro rebotes defensivos e un ofensivo e competiu durante preto de 19 minutos.
Con esta vitoria, as hispanas conseguiron o pase a cuartos, onde agardaba unha forte Serbia, que resultou vencedora por un 64-71. Estando á altura da competición, a galega apareceu para dar forza ás españolas en varias ocasións, superando no una a un á serbia Jelena Brooks, pero a remontada estaba complicada. Neste encontro, Carrera aumentou a súa presenza en pista, xogando 25:36 minutos, e anotando nove puntos, cun 66,7% de acerto desde os tiros de campo.
No último partido, a galega Raquel Carrera comezou formando parte do quinteto inicial ante as rusas. De novo, a xove galega fíxose forte ante a adversidade, e foi quen de aumentar a vantaxe a favor da Selección no terceiro cuarto. Xunto a Cazorla, a 14 vermella seguía sumando para o combinado estatal.
Porén, o equipo ruso foi quen de facerse co control do partido nos minutos decisivos. As españolas intentaron a remontada ata o final, pero un 74-78 final botou por terra os soños da Selección. Neste encontro, Carrera xogou máis de media hora, proba da confianza que deposita o seleccionador Luis Mondelo nela, e foi quen de anotar 11 puntos, ademais de catro rebotes e unha asistencia.
