O HC Borbolla intentouno, pero non puido co líder do Grupo D da Ok Liga o grupo que loita pola salvación. O CP Esneca Vila-Sana domina a clasificación dun xeito indiscutible e que non baixa o nivel contra ningún rival pese a ter xa garantida a súa praza o vindeiro ano na elite estatal do hoquei a patíns feminino.
As galegas terminaron por caer 1-3 na súa propia cancha o pavillón de Monte Alto na Coruña. Lucía Yáñez foi a autora do solitario gol das tomatitas.
O partido tivo un comezo rudo e algo non lle gustaba xa de inicio a Santi Martínez, adestrador do HC Borbolla que pediu un tempo morto cando non se levaban consumidos nin 10 minutos de xogo. Sen saber cales foron as indicacións do técnico galego nese momento ás súas pupilas o que temos claro é que as cousas non saíron como el buscaba. Polo menos o que aconteceu non foi favorable aos obxectivos de salvación das galegas.
Non pasaran nin dous minutos e o CP Esneca Vila-Sana anotaba o primeiro dos seus tantos por medio da súa capitá, María Porta Escoda. Un minuto despois era a arxentina Soledad Ortiz a que batía a Fernanda Tapias. A 12:30 para o final da primeira metade o HC Borbolla perdía na casa 0-2.
As tomatitas non baixaron os brazos, e con case 6 minutos para o final Lucía Yáñez recurtaba distancias colocando o 1-2 no marcador luminoso de Monte Alto. O adestrador do CP Esneca Vila-Sana pediu tempo morto. As catalás se empregaba a fondo en defensa. Oito faltas por catro das locais ao final da primeira metade son unha proba delo.
Fernanda Muñoz tivo o empate para o HC Borbolla preto
Á volta do descanso con 1-2 no marcador a arxentina Soledad Ortiz vía cartón azul e se sinalaba falta directa. Ao disparo, Fernanda Muñoz, pero sen éxito no tiro. Tería sido un golpe de efecto se aos dous minutos do segundo acto as galegas do HC Borbolla empatasen o partido, pero non foi así.
As coruñesas apretaron e tamén se foron metendo en faltas, pero aínda así, as primeiras en chegar ás dez foron as xogadoras do CP Esneca Vila-Sana. Tentou anotar a falta directa Lara Yáñez, pero non atinou a bater a Anna Ferrer.
Non pasou moito e o HC Borbolla chegou tamén ás dez faltas. No disparo das catalás, a outra das irmás Porta Escoda, Victoria. Pero non foi quen de perforar a meta defendida por Fernanda Tapia.
O terceiro gol visitante chegaría de xogada con Soledad Ortiz como executora do disparo que fixo o 1-3 co que se chegou ao final do partido.
A catro puntos da salvación
Este resultado, alonxa ás galegas dos postos de salvación na Ok Liga e as coloca penúltimas con 12 puntos e a catro do primeiro lugar que outorgan a permanencia (a terceira praza que ocupa o Igualada Femení HCP.
O seguinte rival das coruñesas do HC Borbolla será o Areces Ecopilas Asturhockey, colista. Non fai falta dicir que as coruñesas está obrigadas a gañar se queren seguir tendo opcións.
FICHA TÉCNICA
HC BORBOLLA: Fernanda Tapia, Lara Yáñez, Fernanda Muñoz, Bea Varzeas e Lucía Yáñez – quinteto inicial -. Tamén xogaron: Julia Cabanas, Antía Rivadas, Alba Díaz (C), Marta Vilas. Edén Avecilla (P).
CP ESNECA VILA-SANA: Anna Ferrer Santacana, Laura Porta Aparici, Joana Comas Vila, María Porta Escoda (C) e Victoria Porta Escoda – quinteto inicial -. Tamén xogaron: Soledad Ortiz Sese, Vinyet Flix, Regina Flix.
GOLES: 0-1 María Porta Escoda. 0-2 Soledad Ortiz. 1-2 Lucía Yañez. 1-3 Soledad Ortiz.
ÁRBITROS: Francisco Javier López Quinteiro e Carlos Chouciño Fernández.
INCIDENCIAS: Partido correspondente á sexta xornada da segunda fase de competición no Grupo D da Ok Liga Feminina de hoquei sobre patíns que loita pola salvación. Disputado no Polideportivo de Monte Alto, na Coruña.
