- O número de licencias federativas da RFGF aumenta con especial presenza no fútbol e no fútbol sala pero contando tamén co fútbol gaélico e o fútbol a pé como disciplinas nas que a presenza feminina medra
Galicia é terra de fútbol e tamén de mulleres loitadoras, cunha personalidade que dá sentido a este movemento de nenas e mulleres que reclaman o seu sitio no fútbol, no fútbol sala e tamén no fútbol gaélico, as tres modalidades deportivas, xunto co Fútbol a Pé, que forman parte da estrutura da Real Federación Galega de Fútbol.
Din os últimos estudos que Galicia é o novo paraíso do fútbol feminino nacional. Todo suma. Houbo e hai referentes, pioneiras, as institucións colaboran e a aposta da entidade que preside Rafael Louzán foi chave para o que fútbol para elas volva palpitar con forza en Galicia, unha terra na que o balón non deixa de rodar.
“Os números nunca minten e están aí. As licenzas de fútbol feminino en Galicia creceron un 377,5% desde o ano 2009”, explican desde a RFGF.
Duas mil das máis de oito mil licencias son de futsal
Trátase da comunidade na que máis aumentaron o número de federadas na última década. Na actualidade, na tempada 2022/2023, o número de nenas e non tan nenas que teñen unha licenza federativa (xogadoras e corpos técnicos) ascende a 8.750, un milleiro máis que o curso pasado e 1.700 máis que na 2019/2020. Destas 8.750, 2.250 pertencen ao fútbol sala, un dos berces da modalidade en España.
Segundo explican desde a RFGF “esta sorprendente e admirable cifra que recolle o noso fútbol responde a unha estratexia que arrincou en 2015 co obxectivo de crear e impulsar as categorías inferiores na formación de xogadoras. Coa creación de equipos de base femininos e a aposta polas seleccións inferiores derrubamos moitas barreiras durante os últimos oito anos”.
Ademais das categorías estatais, nas que Galicia conta con 10 representantes (Primeira Federación, Segunda Federación e Primeira Nacional Feminina), o fútbol galego feminino autonómico conta cun total de 198 equipos distribuidos nas seguintes categorías:
- Primeira División Galega Feminina – Arzúa-Ulla DOP
- Segunda División Galega Feminina
- Liga Galega Cadete
- Liga Galega Infantil
- Liga Promesas
- Liga Galega Feminina de Fútbol 7
O noso fútbol sala é unha referencia nacional
En todo isto non hai que esquecer o destacado papel do fútbol sala no auxe desta categoría en Galicia. Estamos nun dos berces da modalidade en España, con 12 equipos en categoría estatal.
Desa ducia de equipos competindo en categorías estatais, nada menos que cinco son os representantes galegos na máxima categoría do futsalfem español (Pescados Rubén Burela, Poio Pescamar, ENCE Marín FutSal, Ourense Envialia e Viaxes Amarelle), e sete na Segunda División do FSF: FSF O Castro, Bembrive, Ourense Envialia B, Valdetires Ferro FSF, Cidade das Burgas GLS, 5 Coruña FS e A Fervenza FS.
A día de hoxe o Pescados Rubén Burela está considerado o mellor equipo do mundo. As Guerreiras Laranxas, con sede na Mariña acumulan títulos e trofeos.
Fala tamén do poderío do futsalfem galego o feito de que ata cinco xogadoras de Galicia forman parte das habituais convocatorias da Selección Española absoluta de FSF que dirixe Cláudia Pons e que é a vixente campioa de Europa.
Para o 40×20, a RFGF tamén puxo en marcha categorías de base única e exclusivamente femininas para as categorías xuvenil, cadete, infantil e alevín, algo que fala ben ás claras da aposta do Comité Galego de Fútbol Sala que dirixe Pablo Prieto polo futsal feminino galego. En números, unhas 2.250 xogadoras de fútbol sala son galegas, detalla a RFGF.
