O presidente da RFGF, Rafael Louzán, asinou este venres un convenio de colaboración coa Asociación Marfil, representada por Sonia Rodríguez, Manuel Ángel Vázquez e Mou Guy, este último xogador de fútbol que na actualidade milita no Rápido de Bouzas.
A firma levouse a cabo na sede da RFGF en Vigo e contou tamén coa presenza do vicepresidente Fernando Iglesias e do delegado Delfín Alonso. Unha sede na que poden verse máis de medio centenar de caixas repletas de diverso material deportivo que foron doando os clubs logo da convocatoria lanzada pola Federación. Durante os meses de decembro e xaneiro tratouse de recopilar o maior número de roupa deportiva para poder enviar posteriormente a Costa de Marfil. A Federación encargouse de recopilar todo o material a través dos clubs de Galicia e a Asociación Marfil encargarase agora de facer chegar toda esa roupa ás persoas que realmente o necesitan do país africano.
Rafael Louzán indicou que “foron máis de 50 os clubs que colaboraron coa iniciativa” e destacou tamén a implicación do colectivo arbitral, “porque doaron tamén moito material que xa non se estaba a usar como camisetas e botas”, material que en gran medida está aínda sen estrear.
Rafael Louzán, presidente da RFGF: “Foron máis de 50 os clubs que colaboraron coa iniciativa”.
O presidente da RFGF felicitou á Asociación Marfil polo seu traballo e salientou a importancia “desta iniciativa” amosándose “moi agradecido aos máis de 50 clubs que nos axudaron”. “Agora só nos queda preparar todo para dispoñer o envío a Costa de Marfil por vía marítima”. Sinalou tamén que para a Federación “esta é a primeira vez que poñemos en marcha unha iniciativa deste tipo e estamos moi ilusionados de que chegue realmente a persoas que o necesitan nun país con poucos medios”. A RFGF está moi comprometida socialmente e participa en diferentes medidas de carácter social, sempre a través da Fundación do Fútbol Galego, como ocorre con este campaña.
Rafael Louzán, presidente da RFGF: ““Esta é a primeira vez que poñemos en marcha unha iniciativa deste tipo e estamos moi ilusionados de que chegue realmente a persoas que o necesitan”.
Mou falou en representación de Marfil indicando que “é un orgullo poder levar a cabo esta iniciativa porque desde que nacemos queríamos axudar aos nenos e aos clubs de Costa de Marfil. Alí poden adestrar, pero fano sen camisetas ou véndose obrigados a compartilas, co risco que iso supón”. A asociación poñerase agora en contacto coa embaixada e coa propia Federación Marfileña de Fútbol para resolver todos os trámites administrativos “e tamén para coñecer perfectamente cales son os clubs que necesitan esta axuda”.
Mou Guy, representante da Asociación Marfil: “É un orgullo poder levar a cabo esta iniciativa porque desde que nacemos queríamos axudar aos nenos e aos clubs de Costa de Marfil”.
A Federación conseguiu reunir arredor dun cento de caixas de material deportivo que agora mesmo están nas sedes de Vigo e Santiago. De alí irán para a central de Marfil en Galicia para xa proceder ao seu traslado ao continente africano.
