O atletismo feminino galego e estatal están de loito logo de coñecerse o pasamento dunha das pioneiras das probas de velocidade no noso país. O pasado mércores 8 de novembro finaba a deportista galega Nela Souto, aos 80 anos.
Na súa despedida á pioneira María Elena Souto Carro, Nela Souto, (A Coruña, 2 de outubro de 1943), a RFEA destacou que esta atleta “representou a primeira gran xeración de velocistas en España na década dos anos, sobre todo cando en 1963 volveu celebrar novamente o Campionato de España feminino, que levantaba a prohibición que tiveron que aguantar as mulleres no noso país durante case tres décadas”.
Explica a RFEA que naquel ano 1963, “concretamente os días 17 e 18 de agosto, tres meses despois de que comezase a practicar, tras ser internacional en hóckey sobre patíns, o antigo Estadio de Montjuïc foi testemuña de como o atletismo feminino celebraba con gran alegría o seu regreso á competición e nesa edición a galega Nela Souto lograba a medalla de bronce en 200m con 29.3, á que sumaría outro bronce en 4x100m co seu equipo da Coruña. Foron as dúas dun total de cinco ao aire libre (100m, 200m e 4 x100m) e unha máis que logrou en pista cuberta (500m en 1965)”.
Nela Souto, campioa de 100 e 200 m
“Ao ano seguinte, chegou o seu mellor momento cando no espazo dun mes logrou os grandes fitos da súa curta carreira deportiva; primeiro, debutando no que foi a estrea feminina do equipo español en toda a súa historia, cun encontro Portugal-España no Estadio José Alvalade de Lisboa, onde Souto logrou a segunda praza nos 100m (12.7) co mesmo tempo que a lusa Lida Faria e igualmente segunda en 200 m logrando aquí o récord de España con 26.6″, relatan desde a RFEA.
Tal e como apunta desde a RFEA “á semana seguinte lograría o dobre título de campioa de España absoluta en 100 e 200 metros no Estadio Vallehermoso de Madrid e completaría o seu momento “máis doce” menos dun mes despois na súa querida cidade natal da Coruña, establecendo en menos dunha semana tres récords de España: o 11 de outubro o de 200m (igualando o 26.6), ao día seguinte o de 100m (mellorando a 12.6 anterior dela mesma de 12.7) e seis días despois sumaría o de 400m (1:00.9) que xunto ao de 4x100m (51.2 logrado o mes anterior en Vallehermoso que lle deu o ouro ao equipo coruñés), convértena xunto a Sandra Myers como únicas velocistas españolas en posuír estes catro récords de España á vez”.
Nela Souto non correu unicamente probas de velocidade. Tivo participado tamén nos 800m onde chegou a correr en 2:31, fixo tamén salto de lonxitude (4.88 m), e chegou a ser “campioa provincial de peso, logrou ser subcampioa de España en 1965 en Palencia, no primeiro campionato de España de campo a través”, lembran desde a RFEA .
“O atletismo español despide a unha das grandes pioneiras da velocidade feminina, que se miramos a progresión que levou e ás cotas que alcanzou nos últimos anos, entenderase mellor por que é bo coñecer e poñer en valor a aquelas velocistas que abriron o camiño”, salientan desde a RFEA, que traslada o “máis sincero pésame á súa familia, amigos e ao atletismo galego. D.E.P.”
