Na pasada fin de semana a Primera Nacional parou a súa competición, unha pausa que moitos equipos aproveitaron para recuperar encontros adiados. Entre eles houbo tres duelos galegos, que enfrontaron a Interrías e Mos, Victoria FC e Friol e Villestro e Umia.
Os partidos disputados corresponderon ás xornadas 16, 15 e 14, e agora os conxuntos están máis preto de ir ao día co calendario programado. Todos eles, agás o Villestro, teñen 17 encontros xogados das 18 xornadas celebradas. O colista non ten ningún partido pendente.
O Interrías mantén a primeira posición triunfando sobre o Mos
O conxunto adestrado por Luis Treviño, o Viajes Interrías, mantense como líder do grupo 1 da Primera Nacional, sumando tres puntos unha xornada máis.
As pontevedresas visitaban ao Mos, un equipo que non logra saír da zona baixa da clasificación. Porén, a diferencia na táboa non foi patente sobre o verde.
O Interrías puido desfrutar dun gol cedo, anotado no minuto 2 por Villadeamigo despois dunha falta. Co 0-1 no marcador e todo o partido por diante, o Mos enfrontábase ao reto da remontada.
O acerto non acompañou ás locais, que con todo non baixaban os brazos. A primeira parte rematou sen máis sorte para as xogadoras de ambos bandos.
Na segunda metade, o Interrías tivo oportunidades de afianzar a vitoria, pero a defensa do Mos aguantou os golpes. O ataque local non acompañaba e a protesta de Irea Piñeiro tras unha acción polémica levouna a recibir unha tarxeta vermella, deixando ao equipo con 10 sobre o campo.
Incluso en inferioridade, o cadro local puido aguantar o tramo final de partido, pero o resultado non mudou. 0-1 e tres puntos para un Interrías cada vez máis preto do ascenso.
O Friol derrota ao Victoria FC para manterse a un paso do líder
Pola súa parte, Victoria FC e PM Friol disputaron o seu encontro da 15ª xornada da Primera Nacional en Santa Isabel. O conxunto vermello plantoulle cara a un rival de altura, que logrou os tres puntos para manterse na loita pola promoción.
O partido comezou con algunhas ofensivas das locais, especialmente pola banda esquerda. A primeira gran oportunidade foi de Noelia, aínda que sen premio ao rematar o balón nas mans da porteira rival.
Na área contraria, o Friol non gozaba de boas oportunidades debido á intensidade defensiva do Victoria, que impedía que as lucenses se achegaran á porta. Con todo, á primeira oportunidade clara que tiveron, as de Covi Regueiro non fallaron e un disparo de Nerea poñía o 0-1 no electrónico.
Na segunda parte, as visitantes tiveron máis ocasións para ampliar distancias, pero a falta de acerto daba motivos para a esperanza entre as vermellas. Os esforzos do Friol tiveron finalmente recompensa, cun gol de Alicia Martínez a só dous minutos do final. O encontro rematou no 0-2.
O Umia vence ante o colista, o Villestro
No encontro de recuperación da 14ª xornada, o Umia CF impúxose ao SD Villestro, que segue sen sumar puntos esta tempada. O duelo rematou nun 0-2.
O Municipal da Barrosa acolleu o encontro, no que os primeiros minutos de partido sostiñan a igualdade no marcador. Non foi ata pasada a primeira media hora cando as visitantes abriron a lata.
Nunha acción defensiva, o Villestro cometeu unha falta que derivaría nun penalti lanzado por Eva López. A xogadora do Umia non fallou e anotou o 0-1.
Con ganas de máis, as pontevedresas lograron anotar o segundo tan só minutos despois. No 34 Carla Rial facía o 0-2, sentenciando o encontro.
O Villestro, colista do grupo 1 da Primera Nacional, xa non soubo reaccionar, e o encontro rematou co marcador conxelado no 0-2. Tres puntos máis para o Umia, que marcha en sexta posición
