A Coruña acollerá esta fin de semana a primeira Regata Isabel Zendal de vela. Trátase dunha competición feminina organizada polo Real Club Náutico da Coruña e que conta co apoio do Concello da Coruña.
Despois dun mes de competicións nas rías de Vigo, Pontevedra, Betanzos e o río Miño, a Semana ABANCA chega á cidade herculina con esta regata.
Este gran premio de vela nace coa intención de consagrarse como unha regata de referencia a nivel nacional e internacional. Participarán dez tripulacións femininas en barcos da categoría J-80.
O Concello da Coruña financiou para as embarcacións do Náutico catro xogos de velas, que serán estreadas nesta competición. Trátase de catro xogos de tres velas cada un –maior, foque e gennaker– de cen metros cadrados.
Esta regata nace para pór en valor a figura de Isabel Zendal, que foi certificada pola OMS como a primeira enfermeira do mundo en misión humanitaria. A competición realízase na Coruña, desde onde partiu en 1803 a embarcación ‘María Pita’ coa Real Expedición Filantrópica da Vacina, tamén coñecida como Expedición Balmis, que permitiu inocular a vacina da varíola nos distintos continentes.
Ao acto de presentación, realizado este venres pola mañá no Náutico, acudiu a concelleira de Deportes, Mónica Martínez, varios directivos do club, como o presidente Fernando Cobián, o delegado de deportes da Xunta, Roberto García, o responsable de relacións institucionais de Abanca, Juan Manuel Vilariño, a subdirectora de Carris Marineda, Bárbara Navas, e a presidenta a Asociación Isabel Zendal, Pilar Farjas.
Así será a regata Isabel Zendal
Participarán na regata Isabel Zendal tripulacións de diferentes clubs nacionais como o Náutico coruñés, o Náutico de Vigo, o Náutico de Sanxenxo, o Club Astur de Regatas de Gijón, o Marítimo de Abra (Bilbao), o Monte Real Club de Yates de Bayona, Vértigo-La Lagoa de Vigo e dúas universidades, unha cunha selección das galegas e a británica University of Sussex, así como a Armada Española.
En xogo estará a Regata Isabel Zendal-Gran Premio Concello da Coruña, na que as dez tripulacións, con 5 ou 6 compoñentes segundo o peso, competirán primeiro en gous grupos de cinco, para disputar os dous primeiros de cada un na gran final o domingo.
Ver esta publicación en Instagram
Todos os equipos poderán despreciar unha puntuación cada 8 mangas celebradas. Serán probas curtas cun tempo límite de 30 minutos, moi técnicas, tipo barlovento-sotavento. As tripulacións terán por cuartel xeral o Hotel Carris Marineda, sendo as dúas primeiras en chegar as británicas e as vascas.
A competición se celebrará durante toda a fin de semana e haberá un total de 60 mulleres que participarán, entre elas as mellores a nivel nacional.
Entre as máis destacadas están a viguesa África Alonso, patrona de Universidades Gallegas, que foi campioa de España de 420, Paloma González, do Náutico de Vigo, Joana Abasolo, do Abra de Getxo, Paula de Rocha, cun pasado na clase optimist espectacular e que agora milita en Sanxenxo, Irene Rodríguez, patrona do Náutico coruñés, Eva Díez, de Gijón, ou Nerea Lemaos, que estará coa Armada Española.
Tal e como recordan desde o Náutico da Coruña, a Semana ABANCA xa fomentou a participación de deportistas de agora alto nivel como Xammar, Bugallo, Tritel, Nico Rodríguez, Botín, Támara Echegoyen ou Sofía Toro.
