O BAXI Ferrol chegou a un acordo coa pivote finlandesa Marianne Kalin para que continúe no conxunto departamental a próxima tempada 2023-24.
A xogadora xa ten experiencia na LF Endesa, xa que militou dúas tempadas nas filas do Embutidos Pajariel Bembibre, conxunto co que participou en 55 encontros. Ademais, foi internacional coas seleccións finlandesas de base e agora forma parte, de maneira habitual, da Selección absoluta.
Na pasada campaña foi unha xogadora importante nos esquemas do conxunto ferrolán, sendo un dos baluartes defensivos do equipo para conseguir o ascenso de categoría.
Lino López: “Marianne Kalin é unha gran profesional”
O adestrador do equipo ferrolán, Lino López, destaca sobre a xogadora que “Mari é unha gran profesional, sempre ao servizo do equipo. É a xogadora que representa perfectamente o noso lema de Humildade e Traballo. É unha sorte poder seguir contando con ela, xa que é unha xogadora que os seus intanxibles no equipo foron claves no éxito da tempada pasada e seguro que o seguirán sendo este ano en LF Endesa”.
Desta forma, coa renovación de Marianne Kalin o BAXI Ferrol xa dispón de seis xogadoras tras anunciar a continuidade de Claudia Soriano, Jessica Fequiere e Marta Gómez, así como as fichaxes de Gala Mestres e de Rachel Howard.
Avanza a campaña de abonados do BAXI Ferrol
Ademais, segue aberta a campaña de abonados para poder renovar ou darse de alta. Polo momento, renovaron o seu abono 402 persoas, mentres que se produciron 42 altas.
Todas as persoas interesadas poden pasarse pola Taberna Arauxa, no Cantón de Molins 6, de martes a domingo de 12.00 a 15.00 e de 18.00 a 22.00 horas. Tamén se poden facer as xestións a través do correo electrónico abonadosuniferrol@gmail.com.
