A pista de atletismo situada no Campus Vida da Universidade de Santiago de Compostela (USC) será renovada e acondicionada grazas a un acordo entre a institución, o Concello de Santiago, a Xunta de Galicia e a Deputación da Coruña.
As catro entidades asinaron un convenio polo cal as instalacións do Estadio renovaranse coa colocación dun novo pavimento. A pista consta dun anel de carreiras de 400 metros de corda e oito rúas. O tipo de obra que se proxecta tamén contempla o marcado e sinalización para a correspondente homologación federativa tal e como establece a Real Federación Española de Atletismo.
Na actualidade a pista de atletismo presenta un considerable deterioro na súa superficie, debido ao uso e ao tempo transcorrido dende a súa execución -o actual pavimento foi colocado en 1998- o que fai necesaria a renovación tanto do propio pavimento, así como a renovación dos elementos que compoñen a pista.
Segundo informa a Secretaría Xeral para o Deporte, hai un mes, o Consello da Xunta daba luz verde ao convenio de colaboración para a renovación e o acondicionamento da pista do Estadio de atletismo situada no Campus Vida, segundo o que a Xunta de Galicia achegará o 35% do orzamento global (173.516,99 euros), a mesma contía que a Deputación da Coruña, mentres que o Concello de Santiago sufragará o 30% restante (148.728,60 euros). A execución o e o remate das obras contratadas terá como data límite o 31 de marzo de 2022.
Uso gratuíto
Cómpre salientar que a USC facilitará o uso gratuíto da instalación para todas aquelas competicións deportivas oficiais organizadas ou promovidas pola Secretaría Xeral para o Deporte, previa sinatura dun convenio de colaboración entre ambas institucións que regule os aspectos específicos destas actuacións.
Ademais, comprométese a favorecer e facilitar a celebración de competicións deportivas de carácter oficial impulsadas polas distintas federacións deportivas de Galicia.
