O PM Friol ten a salvación un pouco máis lonxe. As galegas veñen de caer derrotadas por un 5-0 ante o líder do grupo D Norte en Reto Iberdrola, o CE Seagull. As primeiras clasificadas golearon ás lucenses na oitava xornada desta fase pola permanencia.
Tras este resultado, o club galego suma a sétima derrota de maneira consecutiva, cun pleno de partidos perdidos nesta segunda fase da competición. Coa oitava xornada xogada, o Friol ocupa a penúltima posición, con 14 puntos e un coeficiente de 0.667, o mesmo que o colista, o Pozuelo Alarcón.
A sétima derrota do Friol
O equipo dirixido por Covi Regueiro saiu de inicio con Sara García na portería e Bernadette Amani, Tamara Álvarez, Lucía Pardob, Mónica Barreiro, Ariadna Castañeda, Goretti Neira, Lara Martínez, Alicia Carranza, Laura Portabales e Nerea Lombardero como xogadoras de campo.
Durante a meirande parte da primeira parte as futbolistas do Friol foron capaces de conter ao Seagull, o mellor equipo do grupo. Tivo que pasar media hora de partido para que as locais abriran o marcador. A autora do primeiro gol foi a 10 das catalás, Nuria Garrote, cun tanto no minuto 32.
O gol en contra non alarmou ás lucenses, que seguiron loitando polo encontro. A sorte non estivo da súa parte, e xusto antes do descanso, Garrote encargouse de poñer o 2-0 marcando distancias para a segunda parte.
Tras o paso por vestiarios o equipo local sentíase cómodo no seu campo e apretaba ás galegas. Así, tan só seis minutos despois da reanudación chegaría o terceiro da 10 do Seagull, asinando o seu hat trick. Cun 3-0 en contra o Friol estaba en apuros, sendo incapaz de xerar ocasións de verdadeiro perigo para as catalás.
Pola súa banda, o equipo de Anabel Junyet seguía controlando o balón e encamiñaba xa a vitoria co cuarto gol, desta vez obra de Priscilla Uribe. Sen moito que facer, o Friol seguiu buscando a súa oportunidade sen atopar a portería contraria. Co minuto 65 chegaría o quinto gol local, anotado por Ainhora Marín.
O duelo estaba xa decidido, pero Regueiro apostou por varios cambios para loitar ata o último segundo. A capitá Lucía Prado saiu no minuto 66 para dar entrada a Laura De La Torre, mentres que Mónica Barreiro facía o propio con Amanda Monterroso. Estas modificacións non xurdiron o efecto desexado, e as visitantes caeron derrotadas finalmente por un 5-0.
Con nove puntos aínda en xogo, as lucenses teñen unha última oportunidade de lograr a permanencia en Reto Iberdrola. O Parquesol é o último salvado, con oito puntos máis que as galegas, e coa oitava xornada aínda por disputar ante o Zaragoza CFF, segundo clasificado.
As galegas enfrontaranse nos seguintes partidos ao UD Collerense, na xornada 9, outra vez ao Seagull, na recuperación da xornada 3, e finalmente ao Espanyol, na derradeira xornada, a décima.
