Véseme?
Se cadra a pregunta parécelles improcedente, rara ou nin a entenden. Pero créanme, preguntar pola miña visibilidade ten unha razón de ser. Así que voulles poñer en situación.
Son muller, ex deportista e xornalista con especial devoción polo xornalismo deportivo que foi o que me trouxo a este oficio hai xa máis de 25 anos. Logo chegou a información cultural, a económica, ata a política, pero o deporte sempre foi o meu recuncho favorito, a miña zona de confort, como agora lle chaman.
E pregunto se se me ve debido a que hai informes que din que nos medios de comunicación a muller no deporte non conta con moita visibilidade. A experiencia persoal dime que, logo de ollar non poucas portadas con certa asiduidade, a aseveración apunta á verdade.
Lembro cando Ana Peleteiro inscribiu o seu nome na historia do atletismo español acadando a medalla de bronce cunha marca de 14,40 metros na proba de triplo salto no Mundial de Pista Cuberta de Birmingham en 2018. Houbo repercusión mediática, pero teño para min que non á altura do fito deportivo acadado. É certo que a situación está mellorando a paso rápido, pero aínda hai moito recorrido por diante para alcanzar a necesaria igualdade na visibilidade.
Segundo as estatísticas do Ministerio de Cultura e Deporte, o número de mulleres federadas en Galicia en 2018 ascendía a 67.273. Esa cifra representaba o 23,5% do total de persoas federadas na nosa comunidade. É certo que o número de féminas é menor ca de homes, pero pensan que a presenza nos medios é parella a esa porcentaxe? E sobre todo, consideran que de contar con máis presenza mediática aumentarían as licencias? Doutra banda, pensemos non só en cantidade senón tamén en calidade e preguntémonos se os méritos deportivos que acadan as deportistas galegas están a ser suficientemente postos en valor polos xornalistas que comunicamos á opinión pública esos fitos deportivos. Na última década teñen colleitado ouros olímpicos, subcampionatos de Europa, Champions… son parte das Leonas de rugby, das Guerreras de balonmán, da Roja de fútbol. Remo, atletismo, halterofilia, vela, voleibol, taekwondo, busquen unha disciplina deportiva e seguro que atopan unha galega que destaca.
Son das que pensa que os xornalistas non debemos ser noticia, pero desta volta vanme permitir que si dea un paso adiante e me presente con fachenda como a directora dun medio xornalístico adicado a pór en valor e visibilizar o deporte das nosas deportistas
Cando miro cara aos lados, de cando empecei a agora, o número de compañeiras que fan información deportiva nos medios galegos aumentou notablemente. Con todo, somos minoría nunhas redaccións con teitos de cristal nas que o home decide que información abre páxina.
Arrincamos proxecto ilusionante que pretende precisamente iso: visibilizar ás mulleres do deporte en Galicia. Formar parte de As Nosas é un honra. Liderar como directora o grupo que integra esta redacción, un soño feito realidade.
Son das que pensa que os xornalistas non debemos ser noticia, pero desta volta vanme permitir que si dea un paso adiante e me presente con fachenda como a directora dun medio xornalístico adicado a pór en valor e visibilizar o deporte das nosas deportistas. Ese paso adiante non é por min. Hai tempo que son unha máis que suma, artigo a artigo, chío a chío, post a post nas redes sociais.
Sei como comunicadora que o que non se ve, o que non se conta, case nin existe para o mundo. Dou este paso á fronte por todas as que andaron camiño antes, polas que están camiñando e sobre todo polas que veñen detrás.
Así que repito a pregunta: Véseme?
