O Campionato de España Absoluto e Júnior de verán, que se celebrou en Gran Canaria nas instalacións do Metropole de Las Palmas, remata con máis metais para a natación galega.
Despois de cinco xornadas de competición, as galegas acadaron seis ouros en categorías absoluta e júnior, dúas pratas júnior e nove bronces absolutos e júnior. Ademais, as deportistas acadaron varias novas Mellores Marcas Galegas da FEGAN e romperon récords establecidos.
A última xornada do Campionato
No último día de competición, Paula Otero Fernández do C.N. Arteixo proclamouse Campioa de España Júnior en 200 estilos cun tempo de 2:21.27. Ademáis foi sétima na final A absoluta.
Pola súa banda, Carla Carrón Muiña do C.N. Arzúa foi segunda en 200 libre Júnior establecendo unha nova MMG de 16 anos con un tempo de 2:03.71.
Ademais, a natación galega tamén foi finalista con Ana Cernadas González do C. Fluvial de Lugo, sendo cuarta en 200 libre Júnior de 17 anos con 2:04.97 e Rosalía Marín Martínez do C.N. Coruña, quinta en 200 estilos júnior de 17 anos con 2:24.14. Tamén foi finalista Martín Vázquez López do C.N. Portamiñá, cuarto en 100 bolboreta Júnior de 18 anos con 56.71.
Balance do torneo para os clubs da natación galega
O éxito da FEGAN debeuse á participación de varios clubs, que aportaron grandes nadadoras en diferentes categorías.
CN Arteixo: O club de Arteixo deixou á unha das grandes protagonistas do Campionato de España de verán, Paula Otero. A nadadora galega foi ouro nos 1500 júnior e absoluto, ouro nos 800 júnior 17 anos e absoluto e ouro nos 400 júnior 17 anos, en absoluta foi bronce. Na última xornada, Otero foi campioa júnior en 200 estilos.
Paula Otero cólgase un novo ouro no Campionato de España de verán
Ademais, a nadadora batiu dous récords do campionato, en 400 libre, superándose a si mesma, e nos 800 libre, así como nos 1500 libre.
Ademais, é a terceira deportista en rendir mellor por puntos na categoría júnior do torneo. Estiveron preto dela Carla Carrón, do CN Arzúa (oitava) e Ana Cernadas, do Fluvial de Lugo (décima).
CN Arzúa: A deportista Carla Carrón proclamouse campioa de España júnior nos 800 libre, sendo cuarta na absoluta, e subcampioa dos 200 libre júnior, establecendo unha nova MMG. Ademais, obtivo o bronce nos 50 libre júnior de 16 anos, unha terceira posición nos 400 libre júnior. Nos 100 libre, foi quinta júnior.
Fluvial de Lugo: Por parte lucense, a nadadora Ana Cernadas resultou campioa de España júnior de 17 anos nos 100 costas, prata nos 100 libres júnior e ouro nos 200 costas júnior, sendo bronce en absoluta. Nesta proba, a galega batiu dúas veces a Mellor Marca Galega. Tamén foi finalista nos 200 libre júnior, quedando en cuarta posición.
CN Galaico: No Galaico, Alicia Bouzas quedou en terceira posición nos 400 estilos júnior, así como nos 200 costas júnior, igualando a súa MMG. Tamén foi finalista nos 1500 libre, acadando o sétimo posto júnior, e nos 400 libre, resultando novena.
CN Coruña: A nadadora Rosalía Marín acadou a cuarta posición en 100 costas júnior de 17 anos e nos 200 costas júnior. Nos 200 estilo júnior resultou quinta.
CN Ferrol: No equipo ferrolá, a competidora Eva Pardo logrou batir as súas marcas persoais, sendo 12º nso 1500, 13ª nos 400 e entrando no top 10 dos 800 libres, todos eles en categoría júnior.
CN Ponteareas: Por último, do Ponteareas a nadadora Iria González resultou 13ª nas eliminatorias dos 200 bolboreta. Carla Faro, do mesmo club, participou nos 200 estilo.
Ademais, tamén competiu neste campionato a galega Aroa Silva, do asturiano CN Santa Olaya. A nadadora foi bronce nos 1500 libre absoluto mozo.
