`A mente en forma’, o primeiro gran evento celebrado en Galicia para promover o coidado psicolóxico das persoas vinculadas ao deporte, terá lugar mañá, venres 12 de decembro, no pavillón de Fontiñas en Santiago de Compostela, entre as 16:45 e as 19:15 horas.
A xornada, que contará con grandes referentes do deporte galego, nace coa intención de promover a importancia do coidado da saúde mental no ámbito deportivo, ao tempo que pon en valor os valores tradicionalmente asociados ao deporte, como o traballo en equipo, a igualdade, o respecto e a superación persoal.
A capital galega reunirá a deportistas, adestradores, rapaces e rapazas, que poderán asistir a conferencias e espazos de diálogo, situando a Galicia como punto de referencia en saúde mental, coidado persoal e práctica deportiva. ‘A mente en forma’ pretende motivar á mocidade e reforzar o traballo conxunto entre os distintos axentes do tecido deportivo galego no coidado do benestar emocional.
A quen se dirixe o evento
Segundo recolle a páxina web da Xunta de Galicia, o evento A mente en forma está dirixido a deportistas de todas as idades, con especial atención a mozos e mozas en formación; clubs deportivos, federacións e asociacións; universidades e centros de investigación en ciencias do deporte; e institucións e organismos públicos interesados no progreso no ámbito social e deportivo.
Obxectivos de `A mente en forma´
Os fins principais desta primeira edición de `A mente en forma´ son: difundir os valores do deporte, como a convivencia, o compromiso e as actitudes positivas; motivar á mocidade mediante exemplos reais de compromiso, persistencia e superación; dar a coñecer oportunidades formativas e profesionais vinculadas ao deporte; concienciar sobre a importancia da saúde mental e da preparación psicolóxica no rendemento deportivo e consolidar a posición de Galicia como exemplo de talento, esforzo e benestar emocional.
Servizo de transporte gratuíto
| Cidade | Hora | Punto de saída |
| A Coruña | 15:20 h | Alfonso Molina (parada de bus Repsol) |
| Ferrol | 15:00 h | Plaza España |
| Santiago de Compostela | 16:15 h | Estación Intermodal |
| Ourense | 15:00 h | Estación autobuses |
| Lugo | 15:00 h | Pazo Provincial dos Deportes |
| Pontevedra | 15:30 h | Parada de Vialia |
| Vigo | 15:10 h | Arenal |
Deportistas confirmados que participarán en A Mente en Forma
Melania Rodríguez (29 de xaneiro de 2001)
Dúas veces campioa do mundo en Doble Mini-Tramp, Melania Rodríguez, revalidou o título conseguido en 2023 o pasado novembro no Campeonato Mundial de Trampolín celebrado en Pamplona. É unha das ximnastas galegas máis destacadas do panorama actual, especializada en Trampolín e Doble Mini-Tramp, e recoñece abertamente que recibe axuda profesional para xestionar as emocións e a presión que lle supón competir no deporte de élite.
Estrella López Sheriff (22 de decembro de 1992)
Actual campioa de España de Judo e gañadora de sete medallas en Grand Prix e Grand Slam, Estrella combina a súa faceta de judoca coa de psicóloga deportiva. Na súa carreira, destaca non só polo rendemento físico, senón tamén pola preparación psicolóxica, subliñando a importancia da intelixencia emocional e da psicoloxía á hora de afrontar os momentos decisivos da competición.
Carolina García (23 de novembro de 1999)
A gañadora da medalla de bronce no Mundial de 2023, Carolina García, ademais de piragüista de augas tranquilas, é licenciada en Biomedicina Básica e Experimental pola Universidade de Sevilla. Combinar estudos e deporte de élite reforzou a súa disciplina e vontade, claves no seu éxito tanto na auga como na investigación científica.
Xisela Aranda (4 de marzo de 1986)
Xisela Aranda, sete veces campioa de España de squash e exfutbolista do CD Tenerife, combina a súa experiencia deportiva coa súa actual actividade profesional na xestión deportiva. Destaca a importancia de construír equipos e ambientes saudables, subliñando que o benestar mental debe acompañar a carreira deportiva dende a base ata a elite.
Borja Iglesias (17 de xaneiro de 1993)
Actual xogador do Celta de Vigo, cunha ampla traxectoria en distintos clubs da máxima categoría nacional, Borja Iglesias é un futbolista comprometido con diversas causas sociais. Participa neste encontro para compartir a súa experiencia no deporte de elite e reflexionar sobre o impacto psicológico que implica a presión e a búsqueda da excelencia.
Brais Méndez (7 de xaneiro de 1997)
O xogador da Real Sociedad é un firme defensor da saúde mental no fútbol profesional. Xa relatou en diversas ocasións as dificultades que experimentou de mozo no Celta, destacando o efecto dos silbidos da afección e das presións negativas das redes sociais.
Javier Gómez Noya (25 de marzo de 1983)
Foi cinco veces campión do mundo de triatlón, catro veces campión de Europa e medalla de prata en Londres 2012, é un referente galego do deporte, chegando a recibir o Premio Princesa de Asturias dos Deportes. A súa carreira combina éxitos deportivos con retos persoais que puxeron á proba a súa disciplina e resiliencia mental, como o longo veto por unha anomalía cardíaca.
Lucas Pérez (10 de setembro de 1988)
Ex-xogador do RC Deportivo de A Coruña e do Arsenal, entre outros clubs, cunha carreira marcada pola perseveranza, a superación persoal e a paixón polo fútbol. Destacou especialmente no Deportivo de A Coruña, vivindo momentos intensos como campañas de éxito, goles decisivos e unha conexión especial coa afección. Como deportista de alto nivel e como persoa que coñece a complexidade do éxito, pode ofrecer unha visión honesta e profunda sobre a saúde mental no deporte de elite.
Santi Tarrío (7 de novembro de 1990)
Dobre campión do Challenge Tour de Golf, comezou a súa carreira moi novo, destacando polo seu talento e a súa alta capacidade de concentración. Despois de sobresair no Challenge Tour, onde acadou importantes vitorias e chegou ao número 1 do ranking, deu o salto ao DP World Tour, consolidándose como unha das figuras claves do golf en Europa.
Guille Carracedo (5 de agosto de 1993)
Campión de España e subcampión mundial de paddle‑surf coa selección española, é tamén licenciado en Medicina pola USC. A súa experiencia combina o deporte de alto nivel coa saúde, ofrecendo unha visión única sobre superación e preparación física e mental. En diversas entrevistas subliña que os retos, a aventura e o risco requiren unha preparación psicolóxica importante.
Víctor Pérez (3 de xuño de 1973)
Conta cunha extensa carreira como técnico en distintas categorías do baloncesto e actualmente é adestrador do CB Breogán, que compite na Liga ACB. Entre os seus logros, destaca a súa participación no corpo técnico da Selección Española Sub-19, que se proclamou campioa do mundo en 2023.
