- A nova pista da Mariña aproveitará e optimizará as instalacións deportivas da Veiga que ademais contan cun pavillón polideportivo.
- O secretario xeral para o deporte, Lete Lasa, destacou a idoneidade da localización xa que non dista máis de 20 minutos da metade da poboación de toda a Mariña, que suma, no seu total 70.000 habitantes.
O secretario xeral para o Deporte, José Ramón Lete Lasa, visitou as instalacións deportivas da Veiga, sitas no Concello de Cervo, na compaña do seu alcalde Alfonso Villares. Ambos dirixentes exploraron as posibilidades de aproveitamento das pistas existentes, así como de todo o complexo deportivo da Veiga e acordaron impulsar conxuntamente a primeira pista de atletismo homologada da comarca da Mariña. Deste xeito, a nova instalación xuntará a tecnoloxía máis moderna xunto a aposta por unha infraestrutura de calidade como a xa existente mediante a súa optimización.
Cómpre salientar que as instalacións deportivas da Veiga, ademais das nomeadas pistas, contan cun pavillón polideportivo. Ademais, o secretario xeral destacou a idoneidade da localización xa que non dista máis de 20 minutos da metade da poboación de toda a Mariña, que suma, no seu total 70.000 habitantes.
As novas pistas homologadas da Veiga, dixo o secretario xeral, darán servizo a “toda e todos os atletas e deportistas de Cervo, da Mariña, de Lugo e de todos os galegos e galegas que queiran facer deporte nunha instalación de primeiro nivel”.
José Ramón Lete Lasa, secretario Xeral para o Deporte da Xunta de Galicia: “As novas pistas homologadas da Veiga darán servizo a todas e todos os atletas e deportistas de Cervo, da Mariña, de Lugo e de todos os galegos e galegas que queiran facer deporte nunha instalación de primeiro nivel”
Desde a secretaría xeral para o deporte consideran que coa nova pista, Cervo e a Mariña occidental situaranse como referentes do deporte na provincia de Lugo.
Segundo explican desde a secretaría xeral para o deporte, nesta nova infraestrutura teñen moito que ver os recentes éxitos do atleta viveirense Adrián Ben, que vén de acadar un diploma olímpico nos 800 metros dos Xogos de Tokyo 2020, onde rematou en quinta posición na carreira final.
Trataríase dunha estratexia similar “á levada a cabo en Riberia, onde xa está publicada a licitación das obras de ampliación do Complexo Deportivo da Fieteira e na que tamén foron decisivos os éxitos de Ana Peleteiro, medalla de bronce en triplo salto en Tokyo”, salientan desde o departamento autonómico.
Hornillos: “Será un antes e un despois na promoción do atletismo na Mariña”
Pola súa banda o presidente da Federación Galega de Atletismo (FGA), Isidoro Hornillos, manifestou a súa enorme satisfacción polo feito de que A Mariña lucense poida contar no 2022 cunhas pistas de atletismo xa que “levamos anos traballando, con moitas xuntanzas e reivindicando esta necesidade. Alegrome moito de que a Xunta de Galicia e concello de Cervo acadaran un acordo, sen lugar a dúbidas, haberá un antes e un despóis na promoción do atletismo na Mariña”.
Isidoro Hornillos, presidente da Federación Galega de Atletismo: “levamos anos traballando, con moitas xuntanzas e reivindicando esta necesidade”.
Suso Vázquez: “É un gran paso para A Mariña”
De igual modo o vicepresidente da Federación Galega de Atletismo, Suso Vázquez destacou “É un gran paso para A Mariña de Lugo, cunha involucración directa da Xunta de Galicia e do Concello de Cervo onde temos que pór en valor o plantexamento dende un concepto comarcal en prol do beneficio do Atletismo na Mariña”.
A Secretaría Xeral para o Deporte afianza así o seu compromiso coas infraestruturas deportivas. Dos 32.474.216 euros cos que conta en 2021 (un 28,5% máis que en 2020), 9,15 millóns serán destinados a obras de creación e reforma de infraestrutura deportiva, un 118% máis que en 2020 cando se destinou ao mesmo obxecto 4,2 millóns de euros.
Suso Vázquez, vicepresidente da Federación Galega de Atletismo, salienta: “É un gran paso para A Mariña de Lugo, cunha involucración directa da Xunta de Galicia e do Concello de Cervo onde temos que pór en valor o plantexamento dende un concepto comarcal en prol do beneficio do Atletismo na Mariña”
En maio oito clubs da Mariña pedían pistas de atletismo para a comarca
En maio pasado, oito clubs da Mariña asinaban un manifesto co título “A Mariña unida por unhas pistas de atletismo” no que, precisamente solicitaban a construción dunha infraestrutura deste perfil na comarca. Os clubs que reuniran daquela para este fin foran o Club Atletismo Ría de Foz, Club Atletismo Burela, Club Atletismo Lourenzá, Sociedade Deportiva Albións da Pontenova, Club Atletismo Ribadeo, Toxiza Clube de Montaña de Mondoñedo, Club Deportivo Egovarros de Viveiro e Peña Lar de Viveiro.
Naquel documento explicaban que “As e os atletas mariñaos teñen que realizar viaxes de ida e volta dunha media de 2h30 de duración, como mínimo, para poder seguir os seus programas de adestramento por carecer dunhas pistas de atletismo”.
Tamén explicaban naquel documento que a “creación dunhas pistas de atletismo na nosa comarca, ademais de potenciar a parcela deportiva, contribuiría a estimular a vida económica da nosa comarca (hostelería, hospedaxe, restauración, etc.), posto que abriría a posibilidade de acoller a organización de diferentes probas de carácter comarcal, autonómico ou estatal nestas instalacións”.
Oito clubs da Mariña lucense solicitan a construción de pistas de atletismo
