Este domingo, día 6 de maio, a cidade da Coruña será o escenario do Campionato de España de Marcha Nórdica a nivel individual e por Seleccións Autonómicas. A proba, que supón a terceira edición do Trofeo Cidade da Coruña de Marcha Nórdica, cita a 178 participantes, 87 delas mulleres.
Esta cita suporá o debut da Selección Galega de Marcha Nórdica, cun total de 16 participantes, a metade delas pertencentes ao Club de Marcha Nórdica da Coruña.
A concelleira de Deportes, Mónica Martínez, presentou en María Pita a competición, coa presenza de Xan Ramírez, vogal de Marcha Nórdica da Federación Galega de Montañismo e delegado provincial da entidade, e Cecilia García, directora técnica do evento e adestradora do Club de Marcha Nórdica da Coruña.
A edila sinalou que o obxectivo do Concello de fomentar a práctica deportiva. O consistorio aposta por este tipo de torneos, que incentivan a práctica e a afección no deporte coruñés, nunha cidade con ampla presenza feminina. O 86% das deportistas federadas do Club de Marcha Nórdica A Coruña son mulleres.
Así será o Campionato de España de Marcha Nórdica
Esta proba estatal, a primeira na categoría desde o inicio da pandemia, está organizada pola Federación Española de Deportes de Montaña e Escalada, a Federación Galega de Montañismo e o Club de Marcha Nórdica A Coruña.
O Campionato dará comezo ás 09:45 horas e finalizará sobre as 12:30 horas, sendo a entrega de premios ás 12:45 horas. O percorrido, de 14 km, transcorre polo Parque Escultórico da Torre de Hércules e consta dunha primeira volta de 5 km, seguinda de tres voltas máis de 3 km cada unha.
Entre as deportistas hai marchadoras de once comunidades autónomas. O País Vasco suma 31 participantes, sendo a comunidade con maior representación. En segundo lugar está Andalucía, con 28. Galicia contará con 26, sendo 13 deles da Coruña, 12 de Pontevedra e un de Ourense. Todos eles pasarán un test de antíxenos antes da saída.
Ademais, entre as marchadoras hai ata sete deportistas que superan os 70 anos, sendo só unha delas muller. A media de idade rolda o tramo entre 40 e 60 anos, cun 68,54% de persoas nesta franxa de idade.
A marcha nórdica, un deporte que aumenta en popularidade
A concelleira agradeceulle á organización a elección da Coruña como sede da proba: “A marcha nórdica entrou na cidade con moita forza, e tras todo o vivido neste último ano, coa necesidade que tiñamos de natureza, aumentou notablemente a afección por un deporte en continuo crecemento, non só polos lugares en que se pode practicar, senón tamén pola gran cantidade de persoas que se interesan na súa práctica; boas razóns non faltan: hábitos saudables, contacto coa Natureza, práctica a calquera idade e baixo custo”.
Pola súa banda, Ramírez agradeceu ao Concello o seu apoio para darlle visibilidade “a un deporte minoritario que medra cada día e nun futuro confío que entre no catálogo de disciplinas olímpicas”.
Mónica Martínez, concelleira de Deportes da Coruña: “A marcha nórdica entrou na cidade con moita forza, e tras todo o vivido neste ano, coa necesidade que tiñamos de natureza, aumentou notablemente a afección por un deporte en continuo crecemento. Razóns non faltan: hábitos saudables, contacto coa Natureza, práctica a calquera idade e baixo custo”
Con motivo desta gran cita, a cidade da Coruña ábrese “máis que nunca” para recibir as deportistas “para que gocen dunha fin de semana na nosa cidade que, pouco a pouco, recupera o pulso dos eventos deportivos”, recorda Mónica Martínez.
Nas últimas datas, a cidade da Coruña converteuse no espazo no que se están a desenvolver múltiples citas deportivas, se a fin de semana pasada foi tempo de motor coa celebración do 25 Rallye A Coruña, arestora estase a celebrar o Campionato de España Individual de Golf e nesta fin de semana na cidade herculina daranse cita o GP Cantóns da Coruña e este domingo o Campionato de España de Marcha Nórdica a nivel individual e por Seleccións Autonómicas.
