Tras seis xornadas, o Maristas Coruña mantense nunha oitava posición con oito puntos. As derrotas comezan a pesar máis que as vitorias, e o equipo coruñés leva dúas xornadas seguidas sen gañar. Este domingo, as xogadoras do equipo coruñés recibirán a un Magec Tías “Contra la Violencia de Género” que ven dunha moi dura derrota contra o líder, o Baxi Ferrol.
As coruñesas confiarán de novo no xogo de Andrea Pérez, a segunda mellor anotadora da categoría e a terceira mellor valorada, con 18,5 puntos de media. Marina Feijóo tamén pode ser outra peza clave no xogo galego, xa que é a xogadora con maior porcentaxe de acerto dende a liña de tres. A elas sumarase a última fichaxe do Maristas, a pívot lucense Ari González.
O rival do Maristas quere deixar atrás a derrota fronte ao Baxi Ferrol
Enfronte, un conxunto que quere esquecer a derrota contra o equipo ferrolán. As canarias irán a pola vitoria para deixar atrás as malas sensacións, pero terán que facelo sen a galega Regina Gómez, nin Yaiza García, Sara Duarte e Carla Medina.