- A localidade lucense da Pontenova albergará por terceiro ano consecutivo esta competición de Descenso do calendario da Real Federación Española de Piragüismo, que tamén será valedoira para o Campionato Galego de Sprint e formará parte do selectivo para os Campionatos de Europa Sub-23 e Júnior e para o Mundial Sénior
- A participación no certame alcanza unha cifra récord, con preto de 260 embarcacións de 21 clubs, procedentes de sete comunidades autónomas
- “A Pontenova está a facerse un oco no calendario de Descenso no noso país polas excelentes condicións que ten. A celebración desta competición ou a da Copa de España de Slalom hai unhas semanas en Mondariz demostran que Galicia é unha referencia na organización deste tipo de probas a nivel nacional”, sinalou Alfredo Bea, presidente da FEGAPI
A Pontenova converteuse xa nunha sede fixa no calendario da liga Nacional de Descenso. O concello lucense será, por terceiro ano consecutivo, a sede da 1ª Copa de España Clásica e Sprint, proba coa que arrincan as competicións nacionais da especialidade.
Esta proba de piragüismo, que organiza o Club Piragüismo Cidade de Lugo, foi presentada na Casa do Concello da Pontenova. O acto contou coa presenza do alcalde da localidade, Darío Campos; o presidente da Federación Galega de Piragüismo e representante na comunidade da Real Federación Española de Piragüismo, Alfredo Bea; e a directora técnica do club lucense, Valeria Romero.
A competición, que se celebrará o 2 e o 3 de marzo, baterá o seu récord de participación, con preto de 260 embarcacións de 21 clubs, procedentes de sete comunidades autónomas. A proba será valedoira para o Campionato Galego de Sprint e tamén forma parte do selectivo para os Campionatos de Europa Júnior e Sub-23, e para o Mundial Sénior.
O certame, que se disputará no leito do río Eo ao seu paso pola poboación, foi presentada na Casa do Concello nun acto ao que acudiron o alcalde da Pontenova, Darío Campos; o presidente da Federación Galega de Piragüismo e representante na comunidade da RFEP, Alfredo Bea; e a directora técnica do Cidade de Lugo, Valeria Romero.
O máximo representante da Fegapi destacou a crecente importancia da cita da localidade da Mariña Oriental: “A Pontenova está a facerse un oco no calendario de Descenso no noso país polas excelentes condicións que ten.
A celebración desta competición ou a da Copa de España de Slalom, hai unhas semanas en Mondariz, demostran que Galicia é unha referencia na organización deste tipo de probas a nivel nacional”. Alfredo Bea puxo en valor tamén que “os clubs galegos tomaron con forza e ganas esta modalidade, o que se traduciu nunha importante presenza de padeeiros galegos e lucenses nas competicións internacionais”.
Pola súa banda, o alcalde da Pontenova animou aos veciños “para acudir a unha competición que se espera apaixonante porque o río presenta este ano unhas condicións espectaculares e un ano máis será un importante atractivo para atraer a centenares de visitantes de todo o país, co efecto positivo que isto supón para a nosa contorna”.
Por último, a directora técnica do club organizador, o Cidade de Lugo, subliñou a satisfacción “de ver como a proba vai crecendo ano a anos, cun importante incremento da participación” e destacou, á súa vez, “a emoción que vai provocar o estado no que baixa o Eo despois das choivas dos últimos días”.
A representación lucense na 1ª Copa de España estará composta por máis de 80 embarcacións do Quixos e do Cidade de Lugo. Na expedición monfortina estará unha das deportistas con maior proxección da disciplina, Noa Díaz; Campioa de España Xuvenil. Por parte do Cidade de Lugo tamén estarán presentes Emma Devesa e Nuria Romero, primeira e segunda na liga de Descenso 2023. As tres lucenses participaron o ano pasado no Mundial disputado en Alemaña.
Categorías e horarios desta Copa de España de Descenso
A proba disputarase nas categorías cadete, junior, senior e veterano nas modalidades de K-1, C-1 E C-2. O sábado celebraranse as dúas mangas da competición sprint (a partir das 15:00 horas) e o domingo será a quenda da proba clásica, cuxa única manga en todas as categorías disputarase desde as 10:00 horas. Tras a cita na localidade lucense a liga de Descenso de Augas Bravas desprazarase o 27 e 28 de abril a Camarasa (Lleida) para a 2ª Copa de España Clásica e Sprint e o Campionato de España Patrullas Sprint
Din desde o Club Piragüismo Cidade de Lugo que “organizar unha proba de tal calibre sempre é motivo de ilusión, pero máis este ano, con récord de participación: competirán case 260 embarcacións procedentes de 21 clubs. Ademais, o caudal co que conta o río Eo ao seu paso pola Pontenova debido ás recentes choivas daralle aínda máis emoción á competición”.
Explican tamén desde a entidade deportiva lucense que contarán con “case unha trintena de embarcacións representando ao Club, entre os que se atopan padeeiros internacionais nesta disciplina como Nuria Romero, Emma Devesa ou Javier Rodríguez. Desexámoslles moita sorte a todos e convidámosvos a que veñades gozar da regata desde a beira”.
