A Liga Galega de hoquei a patíns 2020 comeza a rodar

Os rodamentos está listos para que os patíns permitan voar ás xogadoras. Os seus sticks están dispostos a guiar a bóla cara á meta rival. E, baixo paus, as porteiras farán da súa meta o fortín máis inexpugnable que poidan. Arrinca a Liga Galega de hoquei a patins. Empeza o espectáculo.

Cinco equipos galegos e un do Bierzo participan na competición. Trátase do HC Deportivo Liceo da Coruña, descendido da Ok Liga e actual campión da Copa Federación Galega Feminina que remataba a finais de 2019. Tamén desde a cidade herculina súmanse o Compañía de María e o CP Borbolla. Non moi lonxe, na vila de Cambre, están as rapazas do HC Cambre e en Compostela o CH Raxoi. O desprazamento máis alonxado será entre A Coruña e Ponferrada onde agrada polas galegas o sexto equipo en loita, a APG Bierzo que se une á competición galaica.

Competición a dobre volta coa mirada posta na final a catro

O sistema de competición será por liga a dobre volta. Aínda que ao ser poucos clubs, a competición rematará na fin de semana do 30 de maio.

A o final desta fase competitiva regular, os catro primeiros clasificados disputarán unha final a catro na que se cruzarán primeiro contra cuarto, e segundo contra terceiro. A cita está marcada para o 6 de xuño.

Os gañadores deses encontros disputarán o cruce definitivo no que se dirimirá quen é o campión galego o 7 de xuño de 2020. Ambos os dous equipos gañarán, coa súa chegada ao partido definitivo, o pase á fase de ascenso á OK Liga.

O último chanzo de cara que Galicia retorne á elite estatal será esa fase de ascenso que se ha disputar, en principio, concentrada nunha fin de semana do mes de xuño. Poderán acudir representantes de Asturias, Madrid, Castela e León, Euskadi, Navarra e Galicia. O premio: ter dereito a militar na OK Liga o vindeiro curso.

A primeira xornada dispútase na mañá do domingo. Compostela e A Coruña acollerán os cruces entre CH Raxoi-APG Bierzo, HC Borbolla-HC Deportivo Liceo e Club Compañía de María-HC Cambre.