Nesta semana o Concello da Guarda realizou unha recepción oficial a Paula Arcos e a José Ignacio Prades despois da súa participación nos pasados Xogos Olímpicos de Tokyo 2020 coa Selección Española de balonmán.
Tal e como manifestou Antonio Lomba Baz, alcalde do municipio, para a vila é todo un orgullo e satisfacción contar con figuras tan representativas no eido deportivo que levan o nome da Guarda polo mundo adiante.
Montserrat Magallanes, concelleira de Deportes, quixo agradecer o enorme esforzo que supón traballar nun equipo de élite como é o Atlético Guardés e o ter participado nuns xogos olímpicos, un feito que, sen dúbida, quedará marcado nas súas vidas.
“Para o Concello da Guarda en agradecemento polo seu apoio”
Para rematar esta recepción o alcalde e a concelleira de Deportes fixeron entrega dun ramo de flores e dunha placa representativa da vila, realizada pola Asociación local Avelaíña, pola súa banda dende o Mecalia Atlético Guardés fixeron entrega ao Concello dunha camiseta oficial da Selección Española, que tamén aproveitaron para firmar e deixar unha dedicatoria “Para o Concello da Guarda en agradecemento por todo o seu apoo nos XXOO Tokyo 2020+1”.
As Guerreras de balonmán acudiron á cita dos Xogos Olímpicos de Tokyo 2020 con triple representación galega. Á ferrolá de Valdoviño Alicia Fernández uniuse Paula Arcos, xogadora do Atlético Guardés, e tamén José I. Prades, adestrador do mesmo equipo e segundo técnico de Carlos Viver coa Selección Española.
José I. Prades: “Alicia Fernández e Paula Arcos estiveron a un nivel moi alto”
