Unha tempada máis, e xa van dez, Uxía une o seu futuro deportivo ao do Ourense Envialia. No club ourensá confían en que “sexan moitas máis”
A cancerbeira renova para a tempada 2021-22. Trátase dunha das gardamallas de máis futuro de Galicia. “Uxía medrou con nós e puidemos comprobar, a través dos anos, a capacidade de esforzo e superación desta rapaza que, sen dúbida, está chamada a facer grandes cousas no fútbol sala”, explican desde o Ourense Envialia ao informar da súa continuidade las filas do conxunto que adestra Gonzalo Iglesias Morenín.
Tal e como lembran desde a entidade ourensá, “lamentablemente esta tempada cruzóuselle no camiño a Uxía o lado máis amargo do deporte en forma de lesión. Pero estamos certos de que isto será algo que a vai facer máis forte se cabe”.
Uxía foi seleccionada para as primeiras xornadas de tecnificación de porteiras da Selección Española, foi campioa da Liga Galega e traballa xa co primeiro equipo do Ourense Envialia na máxima categoría do fútbol sala feminino español. Ao lado ten a outra grande porteira como é Vane Barberá que, seguramente, poderá axudala a medrar baixo paus e madurar a súa preparación. No Ourense Envialia non dubidan que “un gran futuro lle espera”.
Desde o Envialia amosan o seu agradecemento polo feito de que Uxía “continúe confiando e medrando con nós”.
