Con case cinco tempadas ás súas costas, e na xornada 28 do presente curso, a galega María Araújo logrou o seu primeiro MVP na Liga Feminina Endesa. A xogadora do SPAR Girona foi a máis valorada no parqué ante o Kutxabank Araski.
Por primeira vez desde o inicio da súa carreira no máis alto do baloncesto español, a viguesa viu recoñecido o seu traballo, entrega e sacrificio na pista. Pero non é a primeira vez que Araújo é clave no xogo do equipo catalán.
Na Copa da Raíña, na que se enfrontou a outra galega, a ourensá Raquel Carrera, a baloncestista viguesa foi determinante na vitoria do SPAR Girona na final.
No duelo entre galegas, Araújo gáñalle a Carrera na final da Copa da Raíña
Os datos da MVP
Despois de ter conseguido o título de Copa, a galega e o equipo catalán retomaron a competición regular e, con ela, o partido que lle deu o recoñecemento como MVP. Nel, Araújo anotou un total de 20 puntos, cun acerto do 88% desde o tiro libre e do 55% nos tiros de campo. Ademais, acadou 11 rebotes, tres recuperacións, e recibiu catro faltas que foron determinantes na vitoria final do seu equipo.
Estes números, e a súa gran actuación sobre a pista, merecéronlle á galega unha valoración de 32 créditos, a maior do partido.
A orixe de Araújo
Os primeiros pasos de María Araújo foron na súa terra, formándose na canteria do Celta Zorka Recalvi. Coa camiseta celeste seguiu xogando ata o 2015, ano no que se mudou a menos de 200 quilómetros de distancia, para xogar co BAXI Ferrol.
Co conxunto ferrolán chegou o seu debut na Liga Feminina Endesa, cando tiña 18 anos. A viguesa seguiu crecendo na cidade departamental, ata que no 2018 decidiu marchar a Polonia.
Despois dun ano xogando co Wisla Cracovia, a baloncestista volveu a España, pero desta vez para xogar cun club de fóra de Galicia. Desde o 2019, a galega ten ficha co SPAR Girona.
Nesta tempada 2020/2021, Araújo xa conta con experiencia e galóns na máxima categoría. Cinco cursos despois do seu debut, a viguesa acumula cerca de 4.000 minutos de xogo en 146 partidos disputados.
Neles, a interior estivo preto noutras ocasións de obter o MVP. Un recoñecemento que vai máis aló da Liga e tamén recibiu en Copa, entrando no mellor cinco da competición.
