A Real Federación Galega de Fútbol (Futgal) e a Universidade de Vigo alíanse na sinatura dun convenio de colaboración. Os principais obxectivos son fomentar a formación e apostar polo fútbol feminino.
Segundo explica a propia Futgal, “grazas a este acordo a UVigo facilitará o acceso de diversas instalacións á Real Federación Galega de Fútbol para o desenvolvemento de actividades deportivas e de formación”. Desta forma, a Federación poderá usar varios espazos da universidade para cursos de adestrador de fútbol e dispor do campo de fútbol universitario.
Asimesmo, a Escola Galega de Adestradores ofrecerá importantes descontos a todo o estudantado da Universidade de Vigo que desexe inscribirse nos cursos de adestramento e ofrecerá prazas en formación non regrada.
Ao acto de presentación de acordo acudiron o vicepresidente da Futgal, Fernando Iglesias; o presidente do Comité Galego de Adestradores e director da Escola, Iván Cancela; e Alfonso Mandado Vázquez, director da área de saúde, benestar e deportes da Universidade de Vigo.
Tanto Iglesias como Cancela mostraron o seu agradecemento á entidade universitaria pola colaboración e destacaron a labor formativa da propia Federación.
