A final da XIV Copa Galicia de futsal non se celebrará o Día das Letras Galegas. O partido entre o Pescados Rubén Burela e o Ourense Envialia terá lugar dous días antes, o sábado 15 de maio, ás 17:00 horas (TVG2).
Narón será de novo o espicentro do futsal galego coa disputa desta final, organizada polo Concello de Narón e os clubs Cidade de Narón, SDC e R. Narón O Freixo, ademais da Futgal. A batalla polo título autonómico terá lugar no pavillón da Gándara.
Burela e Envialia, dous dos clubs galegos da Primeira División, finalistas da Copa Galicia
Xunto ao Poio Pescamar, Burela e Envialia, os finalistas da Copa Galicia, son os máximos representantes do talento galego na máxima categoría, a Primeira División, onde compiten polo título desta campaña.
Así mesmo, o Pescados Rubén Burela vén de conquistar outro título máis: a terceira Copa da Raíña consecutiva e cuarta no seu palmarés. Na final, as Guerreiras Laranxas derrotaron ao Torreblanca Melilla e nos cuartos da competición ás ourensás do Envialia. O conxunto da Mariña foi recoñecido ademais este ano como o mellor equipo feminino do mundo.
As burelistas chegan a esta final tras derrotar en semifinais ao Viaxes Amarelle, outro club galego da Primeira División, que porén loita agora por non descender de categoría.
Pola súa banda, o Ourense Envialia pasou á final da Copa Galicia despois de superar ao Poio Pescamar, e vén de participar tamén na Copa da Raíña. Na competición regular son actualmente oitavas no grupo polo título.
Como reservar a miña entrada?
Todo aquel interesado en asistir poderá reservar a súa entrada para a final. Só haberá que enviar un mail indicando nome e apelidos, DNI e un teléfono de contacto a ofreixonnaron@ymail.com.
As entradas venderanse por 10€ aos adultos e 5€ a menores ata 14 anos ata completar o aforo. O propio día do partido recolleranse na taquilla. O teléfono para realizar consultas é o 606 695 253.
