O Palexco acolle esta fin de semana a Feira do Corredor (Exporunning), un evento que non se celebraba na cidade desde o ano 2015 e que, plantexada como unha das actividades complementarias a Maratón Atlántica Coruña42, que se celebrará este domingo, permitirá á cidadanía coñecer as últimas tendencias en nutrición e materiais deportivos, así como a asistencia a coloquios relacionados co deporte, a psicoloxía e fisioterapia.
A Feira do Corredor está aberta á cidadanía desde este venres, 30 de setembro (de 17.00 a 21.30 horas), coa segunda e última xornada prevista este sábado 1 de outubro (de 10.00 a 20.00 horas).
A concelleira de Deportes do Concello da Coruña, Mónica Martínez, puxo en valor “a proposta didáctica e divulgativa” da Feira do Corredor, que neste 2022 conta coa atleta galega Julia Vaquero como a madriña da edición. Vaquero será, ademais, unha das principais protagonistas nos coloquios que terán lugar este sábado no Palexco, compartindo mesa co tamén atleta coruñés Andrés Díaz, representante nacional nos Xogos Olímpicos de Atlanta e Sidney nos anos 1996 e 2000.
👏 Comezamos con esta primeira xornada da #Exporunning, a Feira dos corredores!
Agardámosvos hoxe de ⏰ 17:00 a 21:30 horas! pic.twitter.com/IYczdXSbCR
— A Coruña Deportes (@coruna_deportes) September 30, 2022
Os horarios dos coloquios de Exporunning deste sábado son os seguintes:
- 17.00 a 17.30 horas: Saúl Sánchez, nutricionista.
- 17.30 a 18.00 horas: Madó González, psicóloga deportiva.
- 18.00 a 18.30 horas: Rodrigo Gavela, campión de España de maratón, sobre o adestramento.
- 18.30 a 19.00 horas: Mesa redonda con Saúl Sánchez, Madó González, Rodrigo Gavela e os atletas Andrés Díaz e Julia Vaquero.
Recorda: de cara ao domingo, podes consultar os Cortes de tráfico por IX Maratón Atlántica C42 e Carreira popular 10K previstos na cidade durante as carreiras.
