Polo de agora, nin Conservas Orbe Rubensa BM Porriño nin Atlético Guardés teñen que lamentar casos positivos en COVID-19 nas súas filas, pero outros clubs non corren a mesma sorte. Os adiamentos ou suspensión de partidos por este motivo son cada vez máis comúns. Por iso, a Real Federación Española de Balonmano e os equipos actualizan o protocolo.
O pasado mércores, 20 de xaneiro, a Xunta Directiva da Federación acordou negociar novas medidas tras poñerse en contacto con varios conxuntos da Liga Guerreras Iberdrola e da División de Honor Plata Masculina. Por este motivo, este martes, 26 de xaneiro, convocouse unha reunión de carácter urxente para tratar o tema.
Outro motivo da actualización do protocolo é que, a comezos de semana, a Asociación de Jugadoras de Balonmano púxose en contacto coa Federación. As xogadoras expresaron as súas preocupacións sobre a seguridade sanitaria nas competicións debido ao incremento no número de positivos detectados nos clubs.
Así, os tests de antíxenos pasan a ser obrigatorios antes de cada partido, e deben realizarse nunha marxe de entre 72 e 48 horas previas ao encontro.
Ata este momento, só en Galicia as medidas obrigaban a realizar as probas cada dúas semanas. Noutros territorios isto non estaba contemplado, polo que moitos equipos de balonmán só realizaban as probas ao viaxar á comunidade galega.
O obxectivo destas conversacións e acordos é o de incrementar as medidas sanitarias que existían ata agora. Tanto o organismo estatal como varios equipos mostraron interese en crear un marco único para preservar aos deportistas e que actúe como reforzo dos protocolos xa establecidos.
Desta forma, segundo informa a Federación nun comunicado, actualmente están a xestionar “un volume importante de test de antíxenos a prezos adquiribles para distribuir entre os clubs de ambas categorías e que se comecen a realizar probas contínuas”.
A COVID-19 afecta indirectamente ás xogadoras galegas de balonmán
Seguindo a obriga de facer controis regulares, ademais do resto de recomendacións e medidas, ningún dos equipos galegos da máxima categoría detectou positivos polo de agora. Porén, si o fixeron algúns dos seus rivais, o que afectou de cheo ás competicións nas que militan tanto Atlético Guardés, como o Porriño.
No caso das primeiras, os positivos de COVID-19 en equipos rivais modificaron por completo o calendario das galegas para este mes de xaneiro. En lugar de disputar os seis partidos de tres competicións distintas que tiñan previstos, as de Prades só puideron xogar a Liga Guerreiras contra o Bera Bera.
Os primeiros encontros que tiveron que cancelar foron os relativos ao Last16 da EHF European Cup. Os positivos no Club Balonmano Elche impediron xogar a eliminatoria e o Guardés pasou de fase sen competir.
Nas mesmas datas, adiouse o partido ligueiro ante o Lanzarote Puerto del Carmen, retrasando a volta á competición regular. No caso da Copa da Raíña, a eliminatoria prevista co Zubileta Evolution Bm. Zuazo terá que cambiar de datas ao ter un positivo no seu plantel.
O Guardés deberá agardar para disputar a segunda fase da Copa da Raíña
As xogadoras do Porriño tiveron menos interrupción no seu calendario, pero tamén tiveron que adaptarse ás circunstancias. O seu partido de Liga ante o CB Morvedre tivo que aprazarse e ambos equipos deben buscar unha nova data.
O que si xogarán é a eliminatoria da segunda fase da Copa da Raíña de balonmán. Os encontros co Aula Alimentos de Valladolid desta semana disputaranse con normalidade. Pero incluso estes duelos estiveron no aire, xa que as vallisoletanas enfrontáronse a pasada fin de semana ao Zuazo, que anunciou esta semana un contaxio nas súas filas.
O Porriño recibe ao Aula Alimentos para a eliminatoria de Copa
