Marines ENKI é un proxecto que xurdiu das familias de Mario e Inés para achegar o deporte a estes rapaces con discapacidade. Desde o 2020, e aliados coa fundación ENKI, un grupo de voluntarios acompaña ás familias nas carreiras populares ás que se apuntan. A próxima cita é a Coruña 10.
Felipe López é un destes voluntarios. Atleta do Club Atletismo Sada, o deportista sabe de primeira man que se esconde tras o lema ’empurrando sorrisos’: “O que queren reivindicar é a posibilidade de facer deporte con fillos que teñen problemas de mobiildade. O lema do grupo é empurrando sorrisos e trátase diso, de levar a Mario e Inés e nesta ocasión vai participar tamén Paula, no seu carro desfrutando da carreira”.
Felipe López: “Non se poden expresar doutra maneira pero fanche entender perfectamente o seu sentir nese momento. É unha experiencia moi gratificante”
O galego estará este domingo na cita da C10, pero non é a súa primeira vez con Marines ENKI. “Participei con eles varias veces e é unha marabilla, porque se lles nota moitísimo cando o pasan ben. Inés por exemplo se vas despacio empeza a refunfuñar porque quere marcha e Mario prefire o monte porque ten traqueteo e unha sensación diferente e lles gusta máis e van sorrindo. Non se poden expresar doutra maneira pero fanche entender perfectamente o seu sentir nese momento. É unha experiencia moi gratificante”.
Felipe coñeceu o proxecto da man da Fundación ENKI e agora forma parte do grupo de voluntarios. “Eles poñen no grupo que temos cando participan ou cando adestran e se se pode alá imos”, resume sobre o funcionamento.
En resumo, ser voluntario dos Marines ENKI e cumprir “a aspiración é simplemente facer deporte e poder participar como calquera outro. Polas súas circunstancias non poden competir, pero que teñan a posibilidade de participar na carreira”.
www.asnosas.gal/rocio-marines-enki-deporte-estamos-normalizados
Tal e como asegura Rocío Alfonso, nai de Inés, “o que proba normalmente repite. É tan bonito. Non sabes o que axudas ata que o fas”.
De feito, Felipe López é tamén guía de Carmen América Gómez, unha atleta cega que soña coa CAMOVI 2023 e que tampouco faltará á cita do Coruña 10.
Carmen América: o soño dunha atleta cega que prepara a maratón da CAMOVI 2023
