A concelleira de Deportes do Concello da Coruña, Mónica Martínez, asistiu á presentación do X Foro do deporte para todos, que organiza a Asociación Galega de Xestores Deportivos (AGAXEDE) co apoio do Concello da Coruña.
O encontro, que se celebrará o vindeiro sábado 9 de outubro na facultade de Ciencias do Deporte e de Educación Física da UDC en horario de 10.00 a 14.00 horas, servirá para analizar o deporte social no pensamento de Coubertín, coñecer os programas de deporte para todos en Portugal e analizar o papel do Comité Olímpico Español no desenvolvemento de deporte para todos.
Mónica Martínez resaltou que iniciativas como o foro axudan a comprender a vinculación do deporte coa cidade e a cidadanía. O Goberno de Inés Rey, dixo, aposta por un deporte que atenda a diversidade, que sexa inclusivo e solidario. “Deste xeito, a súa práctica convértese nun instrumento de intervención social para integrar a todas e todos”, sinalou.
O Foro de Deporte Para Todos celebrará este 2021 a súa décima edición, o sábado día 9 de outubro, a partir das 10:00 horas no salón de actos da Facultade de Ciencias do Deporte e a Educación Física da Universidade da Coruña, organizado pola Asociación Galega de Xestión Deportiva co apoio do Concello de A Coruña. Nesta ocasión a temática do foro será “O Deporte social e cidadán no marco federativo”, e contarase cos relatorios de profesionais cunha gran experiencia no sector.
Os obxectivos do evento serán:
- Analizar o deporte social no pensamento de Couberín.
- Coñecer o deporte para todos en Portugal.
- Analizar o papel do Comité Olímpico Español no desenvolvemento de deporte para todos.
O día anterior ao foro, realizarase a inauguración da Exposición Pierre de Coubertin da Real Académia Olímpica Española, no Centro Ágora de A Coruña.