O Consello Municipal de Deportes (CMD) do Concello da Coruña botará andar no mes de decembro. Será un órgano consultivo e de participación do mundo do deporte da cidade, así como un instrumento para potenciar a promoción do deporte a actividade física. A creación deste órgano responde á importancia que ten o deporte na vida da cidade herculina.
No anuncio ante os medios, a alcaldesa, Inés Rey, sinalaba que para o Goberno local “a creación deste consello sempre foi unha prioridade, desde o inicio do mandato” e, asegura, “que pronto será unha realidade”.
Pola súa banda, a concelleira de Deportes do Concello da Coruña, Mónica Martínez, considera imprescindible a creación deste órgano dada a importancia que ten o deporte na vida da cidade, “porque son milleiros de coruñeses que cada día fan deporte en clubs, asociacións, equipos ou simplemente na rúa e nas prazas”.
Un plan estratéxico de deportes para A Coruña
Regulamento de uso de instalacións, criterios para valorar convenios ou bolsas serán algúns dos temas para os que se contará coa opinión do Consello Municipal de Deportes. Neste sentido, desde a Concellería de Deportes considérase “vital a participación e a contribución do mundo do deporte da cidade nas decisións que se tomen desde o Concello, por exemplo á hora de elaborar o novo regulamento de usos de instalacións, para fixar criterios e valoracións de convenios, subvencións e bolsas e mesmo para elaborar un plan estratéxico de deportes dunha cidade que pretende vencellar a súa imaxe e marca ao deporte”, explicou Martínez.
A creación do CMD conseguirá ademais dar resposta ás demandas, os problemas e as necesidades que afectan as diferentes axentes deportivos da cidade; funcionará a través de grupos de traballo co fin de asesorar ao Goberno municipal en materia de deporte e de actividade física. A formación tamén participará no deseño, avaliación e seguimento dos plans, os programas e as actuacións deportivas.
Desde a Concellería de Deportes apuntan que “todos os clubs inscritos no Remac serán invitados a participar no futuro Consello Municipal de Deportes”.
