O Polideportivo San Francisco Javier de A Coruña será o escenario onde ata cen das mellores halteras do país disputarán o Campeonato de España Absoluto de halterofilia. Debido ás condicións sanitarias actuais, o campionato sufriu varias modificacións. Para poder seguir os protocolos e as medidas sanitarias establecidas, o número máximo de participantes limitouse a 50 por sexo, e coa obriga de ter acadados como mínimo 58 puntos elite no caso das deportistas femininas e 65 para os masculinos.
Desta forma, A Coruña recibirá só ás mellores e máis preparadas deportistas de cada categoría. Entre as halteras máis destacadas atópanse galegas como Irene Martínez e Irene Blanco, que competiran con outras grandes da disciplina como Ilia Hernández, Ana de Gregorio e Mouna Skandi. Porén, a campiona olímpica, mundial e europea Lydia Valentín non participará nesta edición.
Nove galegas de cinco clubs de halterofilia viaxan ata A Coruña
En total, das 48 deportistas da categoría feminina nove son galegas. Proveñen de clubs como o Club Halterofilia Sulyos, o C.H. Pabellón, o Club Halterofilia Norte, C.H. Vigo e o C.H. Coruña, que compite en casa.
Entre elas destaca a herculina Irene Martínez, do C.H. Coruña, que suma 246,69 puntos Sinclair e 78,45 de elite, posicionándoa como a cuarta con mellor puntuación entre as clasificadas. Martínez sufriu unha lesión que a tivo alonxada das competicións, pero volveu con forza logrando unha sétima praza na XVIII Copa de España de Halterofilia.
Entre as galegas, seguena Nathalia Andrea Paz, do pontevedrés Club Halterofilia Norte, que acumula 246,69 e 78,4 puntos respectivamente e outra haltera coruñesa, Irene Blanco, con 229,2 e 69,39 puntos. Blanco ven de ser declarada campioa de España júnior de halterofilia na categoría de 87 kilos, nunha competición que tamén se celebrou na cidade de Coruña o pasado mes de outubro. A boa forma de Irene Blanco permitiulle acadar tres ouros no campionato júnior e competir agora na edición absoluta aínda sendo unha deportista moi nova que conta aínda con idade para competir en categoría júnior.
Completando as participantes galegas están Abla Itziar, do Halterofilia Norte; Eva Carrera, do Pabellón; Noelia García, do Coruña; Arancha Puime, do Pabellón; Teresa Somoza, do Vigo e Eva Fernández do Pabellón.
Participación masculina
Na categoría masculina, ata dez galegos disputarán os ouros. Sete deles fórmanse no C.H. Coruña, con Ferenc Szabo ao fronte, sendo así o club galego que máis deportistas aporta á competición.
Deste mesmo club ademais son os tres halteras que chegan con máis forza á competición. Víctor Castro encabeza aos galegos con 364,37 puntos Sinclair e 80,97 de elite. Detrás del atópanse o seu compañeiro Martín Liste, con 354,41 e 76,46 puntos respectivamente e o irmán de Víctor, Carlos Castro, que leva 315,34 puntos Sinclair e 68,75 puntos elite.
O listado completo das participantes pode consultarse na web da Real Federación Española de Halterofilia.
Aínda que a competición comeza o sábado 14, coas categorías masculinas desde as 09:00 horas, haberá que agardar ata o domingo 15, á mesma hora, para ver competir ás halterófilas. A competición poderá seguirse ambos días en directo a través de LaLigaSportsTV.
La competición se podrá seguir, en DIRECTO y desde las 9:00 h., a través de @LaLigaSportsTV, en los siguientes enlaces:
Sábado 14/11/20: https://t.co/mSt23bDo8T
Domingo 15/11/20: https://t.co/bi5pO6fuY7 https://t.co/9BjThxTRfZ
— (@fedehalter) November 13, 2020
