Hai luz verde. Este sábado, 19 de febreiro, a cidade acollerá o Coruña Big Waves, un torneo internacional de ondas xigantes que servirá para outorgar o título do campionato nacional e autonómico de dita modalidade.
As previsións meteorolóxicas son as idóneas para os e as deportistas grazas ao tren de borrascas que impactará desde este xoves na península, tal e como informa a concellería de Deportes coruñesa. Será a primeira edición deste evento impulsado polo Concello da Coruña. A competición do Coruña Big Waves dará comezo ás 8:30 horas e rematará arredor das 16.00 horas, dando paso á entrega de trofeos. Antes, este mesmo xoves, haberá un adestramento no Portiño.
As ondas grandes son un fenómeno natural que cada día chama a máis practicantes, ao longo da costa española. Galicia é xa un lugar de referencia estatal e internacional desta modalidade dentro dos case 8.000 quilómetros de costa que contamos na península.
A onda do Portiño
Na cidade da Coruña, a onda do Portiño, como afirman os que a coñecen ben, é unha esquerda moi potente e extensa na que é necesario adestrar para saber surfeala.
O lanzamento da primeira edición do Coruña Big Waves é unha aposta do Concello da Coruña co asesoramento técnico nesta modalidade tan específica por parte de After Surf, a Federación Española de Surfing e a Federación Galega de Surf. Coruña Big Wave sitúa á cidade da Coruña no calendario internacional de ondas grandes.
Eric Rebiere, especialista en ondas grandes e descubridor do Portiño xunto ao galego Juan Fernández, asegura sobre o Coruña Big Waves que “agora mesmo no mundo non hai ningunha onda así de grande nun centro urbano como A Coruña. A posibilidade de que a xente poida chegar practicamente andando desde as súas casas é espectacular”.
REMI BERTHET
Eric Rebiere: “A posibilidade de que a xente poida chegar practicamente andando desde as súas casas é espectacular”
O surfeiro francobrasileiro e residente na Coruña é coñecedor desta onda desde hai moitos anos e asegura que “O Portiño ten un pico bastante definido, polo que é unha onda de fácil posicionamento, o que axudará aos competidores da proba para baixar ondas moi grandes”.
Para o coruñés Juan Fernández, actual campión de España de ondas grandes e un dos surfeiros que mellor a coñece, a onda do Portiño “é unha onda difícil, pero con moito potencial e á beira da miña cidade, onde estaría moi ilusionado de competir”.
