A cidade da Coruña acollerá ao longo do mes de setembro unha nova programación de actividades de iniciación á escalada e á marcha nórdica, organizadas pola Agrupación de Montañeiros Independentes (AMI) e financiadas polo Concello da Coruña. O obxectivo é facilitar un primeiro contacto con estas disciplinas deportivas, fomentando a práctica de actividade física e hábitos saudables desde idades temperás.
A programación de escalada estrutúrase en función de tramos de idade, con horarios adaptados e distintos espazos de desenvolvemento:
- De 5 a 7 anos: mércores 3 de setembro, na sala de bloque de AMI, de 16.30 a 17.30 h.
- De 8 a 10 anos: mércores 3 de setembro, tamén na sala de bloque de AMI, de 17.30 a 19.00 h.
- De 10 a 12 anos: martes 2 de setembro, no rocódromo municipal de Riazor, de 16.30 a 18.00 h, e xoves 4 de setembro, na sala de bloque de AMI, de 16.30 a 17.30 h.
- De 13 a 15 anos: martes 2 de setembro, no rocódromo de Riazor, de 18.00 a 19.30 h, e xoves 4 de setembro, na sala de bloque de AMI, de 18.00 a 19.30 h.
Así mesmo, a oferta de marcha nórdica incluirá catro sesións específicas, tamén en setembro, en horario de 18:00 a 19:00 h na sala AMI:
- Martes 2 de setembro e xoves 4 de setembro: bautismo de marcha nórdica en familia
- Martes 9 de setembro e xoves 11 de setembro: bautismo de marcha nórdica para adultos
Todas as actividades requiren inscrición previa e as persoas interesadas poden obter máis información ou reservar praza a través do correo electrónico info@amimontanismo.es ou no teléfono 667 96 72 27. O prazo de inscrición estará aberto ata o luns 1 de setembro. A actividade ten un custe simbólico de 5 euros no caso da marcha nórdica.
Segundo aseguran desde o Concello da Coruña “esta programación enmárcase no compromiso municipal co deporte de base, a saúde e o benestar da cidadanía, apostando por propostas accesibles que cheguen a distintos sectores da poboación. Nos últimos anos estanse a reforzar as iniciativas que promoven o deporte en contornas seguras e con perspectiva educativa, facendo especial fincapé no apoio ao tecido asociativo e ao uso responsable dos espazos municipais”.
