- O Concello da Coruña e a Federación Galega e Española de Surf organizan o Campionato de España de Surf Open 2024: ‘A Coruña King and Queen of the Bay’, que se celebrará os días 18, 19 e 20 de outubro, se as condicións son as apropiadas, na praia do Matadoiro.
Desde o Concello da Coruña explícase que se está a facer unha “aposta pola celebración na cidade de grandes eventos deportivos, como é o caso deste campionato, que baixo o nome de ‘A Coruña King and Queen of the Bay’ reunirá aos e ás mellores surfistas do país”.
Durante tres días de competición deste Campionato de España de Surf Open 2024 os e as participantes loitarán polo título de campión e campioa de España 2024 de surf no ‘A Coruña King and Queen of the Bay’.
Ademais, o ou a deportista que durante a fin de semana surfee a mellor onda levará un distinguido premio co nome de Tito Fariña, en homenaxe ao pioneiro surfista coruñés falecido hai catro anos.
Ademais, o evento contará con diferentes propostas de ocio e gastronomía para complementar a actividade deportiva. Na Coruña Haberá concertos, zona gastronómica e comercial e diferentes actividades que se irán desvelando nas vindeiras semanas.
Tres zonas con diferentes actividades
O evento dividirase en tres zonas: a fonte dos surfistas, onde estará a parte deportiva do evento; o paseo marítimo, entre a fonte dos surfistas e a Finca dos Mariño, onde se situarán as diferentes propostas gastronómicas e comerciais; e a propia Finca dos Mariño, onde se celebrarán as actuacións musicais.
Entre as actividades paralelas previstas haberá charlas sobre a historia do surf en Galicia e sobre o surf adaptado, recollida de lixo nas praias, clases de skate e bautismo de surf para persoas con diversidade funcional e outros obradoiros.
Por outra banda, os concertos serán as noites do 18 e 19 de outubro, e un dos días haberá unha sesión nocturna de surf.
Un cento de surfistas no ‘A Coruña King and Queen of the Bay’
Está prevista a participación dun cento de deportistas de primeiro nivel nacional, sendo as delegacións máis numerosas as de Galicia, Canarias, País Vasco e Cantabria. A asistencia a todas as actividades e eventos será gratuíta.
A competición deportiva está financiada polo Plan de Sostibilidade Turística A Coruña Sostible e Dixital, cuxas actuacións son financiadas a partes iguais pola Secretaría de Estado de Turismo, a Axencia de Turismo de Galicia e o Concello.
