A Coruña acollerá tres destacadas competicións nacionais e internacionais de tríatlon convocadas os próximos 1 e 2 de xullo: o Campionato de España de Tríatlon en distancia olímpica, a Copa do Mundo de Paratríatlon e a quinta cita do circuíto nacional Pho3nix Kids Triathlon Series de Javier Gómez Noya, dedicado ás categorías inferiores e que recalará por segunda vez na cidade.
O programa de competicións comezará o sábado 1 de xullo coas probas de Pho3nix Kids Triathlon Series de Javier Gómez Noya, con saídas pre-benxamín, e benxamín ás 11.00 horas, alevín ás 11.30 horas e infantil e cadete ás 12.00 horas e distancias adaptadas ás categorías.
As e os deportistas participantes na Copa do Mundo de Paratríatlon tomarán a saída o sábado 1 de xullo a partir das 15.00 horas, e a cerimonia de entrega de premios para todas as categorías está prevista na zona de meta en María Pita ás 18.30 horas.
O Campionato de España de Tríatlon de distancia olímpica de categoría Elite completará a primeira xornada de competicións FETRI na Coruña 2023, con saída feminina ás 18.15 horas e masculina ás 20.20.
O domingo 2 de xullo a partir das 08.30 disputarase o nacional de Tríatlon Grupos de Idade e durante a mañá as carreiras polas medallas nacionais das categorías xuvenil, con saída feminina ás 11.45 e masculina ás 12.30; e júnior, ás 13.15 a saída feminina, e ás 14.00 horas a masculina.
Recorrido das probas de triatlón nas rúas da Coruña
O circuíto de natación desenvolverase no espazo entre o porto e o castelo de San Antón e o circuíto de ciclismo e a carreira a pé polo paseo marítimo coruñés, rematando na praza de María Pita.
As incricións xa están abertas e poden realizarse na páxina web da Federación Española de Triatlón.
O Concello da Coruña busca que a cidade acolla a celebración de diferentes competicións de ámbito nacional e internacional. Ademais destas citas, son un exemplo deste tipo de actividaes campionato do marcha atlética celebrado a pasada fin de semana e que trouxo á cidade aos mellores deportistas a nivel mundial da disciplina.
