IAGO CEREZUELA / SILVIA CARREGAL
Hai 39 anos, A Coruña, e polo tanto Galicia, gañaban a súa primeira Copa da Raíña. Foi mérito do Karbo, un club forxado nun colexio do barrio dos Mallos na cidade herculina no que xogaron enormes futbolistas. En As Nosas quixemos ver de preto ese trofeo, collelo na man e falar con José Mañana, o técnico que adestraba ao equipo daquela. Para iso acudimos a este centro educativo coruñés que conta con 50 anos de historia.
Catorce anos estivo Mañana como técnico á fronte do banco do Karbo. No seu palmarés, entre outros moitos títulos, a Copa da Liga da tempada 1982-83 e esa Copa da Raíña de fútbol feminino da que falamos que se conseguía no ano 1981 en terras catalás.
José Mañana, lembraba que o primeiro título estatal que gañaba o Karbo: “Foi a Copa da Raíña disputada en Tarragona diante do Ricard de Las Palmas. Gañamos 2-1 no campo do Gimnástico de Tarragona”.
Mañana, adestrador do mítico Karbo: “Gañamos a Copa da Raíña en Tarragona, diante do Ricard de Las Palmas, 2-1”
Logo virían aínda máis títulos. Foi unha etapa gloriosa para o fútbol feminino galego. Nunha conversa mantida no colexio coa vitrina de trofeos do centro como fondo, Mañana lembra a cantidade de xente que acudía a ver xogar a aquel grupo. Destaca as grandes entradas que rexistraban os campos nos que o Karbo xogaba.
Os seareiros/as ían ás canchas desexosos de gozar coa calidade do fútbol que desplegaban mulleres como Lys Franco, Inma Castañón ou Pili Neira.
Tal e como recorda Mañana: “no Karbo Deportivo volvéronse gañar tres Copas máis da Raíña, xa sendo Deportivo. No Karbo do centro, independente do Deportivo, só temos esta e unha Liga”. Aí é nada como palmarés.
Mañana, adestrador do mítico Karbo: “no Karbo Deportivo volvéronse gañar tres Copas máis da Raíña, xa sendo Deportivo”
A crónica do partido daquel triunfo na competición do K.O. pódese ver en xornais deportivos da época como El Mundo Deportivo.
Agora, é a quenda do Dépor ABANCA
O vindeiro martes 11, o RC Deportivo recibe ao Valencia C.F. no Riazor-ABANCA. Este partido será o seu primeiro chanzo na escaleira que pode levar ás deportivistas a chegar e encher nesta primeira tempada na Liga Iberdrola.
Trátase dun partido moi emotivo por varios motivos. Por unha banda sería o primeiro partido oficial do RC Deportivo no ABANCA-Riazor nesta nova etapa. Non hai que esquecer que o Karbo Deportivo tamén xogou no estadio municipal da Coruña aló polos anos oitenta.
Por outro lado, supón o debut na Copa da Raíña do grupo que adestra Manu Sánchez. O RC Deportivo tense convertido no equipo revelación na competición de Liga Iberdrola e está sendo tido moi en conta polos rivais de cara ao torneo do K.O.
A recomendación de Mañana para o Dépor
O consello para corpo técnico e xogadoras do RC Deportivo, dun home que ten adestrado un club que foi campión de Liga e de Copa é sinxelo pero seguramente eficaz: “Que xoguen con moita intensidade e que ofrezan todo o que teñen dentro. Así se chegará á final”. Iso lles recomenda José Mañana.
O desexo de José Mañana, técnico do Karbo durante catorce anos, de cara a esta participación das branquiazuis na Copa da Raíña 2020 foi sincera e clara: “Ogallá o Deportivo a gañe”.
Mañana, adestrador do mítico Karbo: “Ogalá o Deportivo gañe”
O martes, no palco de Riazor, están convidadas algunhas das protagonistas do Karbo Deportivo como Inma Castañón. Elas, xunto con Mañana, son as protagonistas dun pasado glorioso para o deporte galego. No terreo de xogo estará o grupo que protagoniza, neste momento, o presente do fútbol galego na élite estatal: o Dépor ABANCA con Manu Sánchez e as futbolistas branquiazuis loitando pola gloria do agora. Teñen no pasado todo un espello no que se mirar. As pioneiras do Karbo marcaron camiño.
Se nos oitenta o fútbol feminino galego acadou a gloria e títulos, nun momento no que loitar por poñer en valor o deporte feminino era aínda máis complicado que agora, nada impide a este bloque de deportivistas capaces e con ganas traballar soñar co máis alto: ser campionas.
