Esta fin de semana, A Coruña acollerá unha cita marcada no calendario da marcha atlética: o GP Cantóns. A proba celebrarase este sábado, 5 de xuño, e este venres as atletas foron recibidas no pazo municipal de María Pita.
A concelleira de Deportes, Mónica Martínez, asegurou na recepción que este campionato é “unha proba das mellores do mundo e determinante para os Xogos Olímpicos e na que o Concello esforzouse para que as condicións das persoas participantes sexan as mellores posibles”.
Así mesmo, Martínez recalcou o compromiso do Concello co deporte, o atletismo e o GP Cantóns, organizado de forma conxunta coa Federación Galega de Atletismo.
No acto estiveron presentes representantes de Ecuador, Brasil, Colombia, México e Guatemala, así como da FGA, encabezados polo seu presidente, Isidoro Hornillos.
Maurizio Damilano (primeiro vencedor do GP Cantóns): “A marcha e A Coruña non se poden separar”
Tamén interviu na recepción Maurizio Damilano, primeiro gañador do GP Cantóns, no ano 1987, quen apuntou que “ter 35 edicións dun evento como este non é fácil; a marcha e A Coruña non se poden separar”. O atleta é ademais delegado técnico da World Athletics.
Pola súa banda, Raúl González, campión olímpico nos 50km marcha e subcampión nos 20 km nos mesmos xogos do 84, quixo destacar o papel da Coruña: “unha cidade que se converteu na urbe que acollerá un evento histórico e decisivo para os Xogos Olímpicos de Toquio. A última parada para Tokio 2020, por iso é trascendente. México quere agradecer esta organización nun momento como o que vivimos”.
Isidoro Hornillos: “Unha cidade foi capaz de lle ofrecer á marcha mundial un gran espectáculo”
Finalmente, o presidente da federación galega, Isidoro Hornillos, subliñou o privilexio de recibir a referentes no mundo da marcha atlética: “Un ano olímpico, un ano especial e o reencontro porque unha cidade foi capaz de lle ofrecer á marcha mundial un gran espectáculo”.
O GP Cantóns, unha proba vital para as marchadoras americanas
A Federación Galega de Atletismo resalta a importancia desta cita para as marchadoras americanas, xa que a maioría das prazas para os Xogos Olímpicos de moitos países hispanoamericanos decidiranse na Coruña, debido á imposibilidade de albergar nos seus países as probas debidas.
Este é un dos motivos polos cales México é o país que máis atletas aporta á competición, cun total de 38, por diante de España.
Os horarios da competición
Este torneo, unha das probas deportivas máis importantes da cidade e das máis prestixiosas no panorama internacional de marcha, desenvolverase neste sábado, a partir das 17:00 horas.
O GP Cantóns dará comezo coas probas femininas e ás 19:00 horas será o turno das masculinas. En total competirán 170 atletas de 29 países participantes.
Debido á actual situación sanitaria, o campionato retransmitirase vía streaming aquí:
