A Coruña acolle a celebración do Campionato Galego Absoluto e de Clubs, segundo informa a Federación Galega de Karate.
Esta cita deportiva terá lugar mañá, domingo 13 de febreiro, no Pavillón do Barrio das Flores. A competición de autonómica conta coa participación de 310 deportistas pertencentes a 23 clubs federados das catro provincias galegas.
A xornada de mañá dará comezo ás 09:30 horas coa competición individual en kata, kumite e para-karate de categoría absoluta. Tamén terá lugar a competición de kobudo (individual e equipos). Na xornada de tarde, que dará comezo ás 16:00 horas, terá lugar a competición por equipos nas modalidades de kata e kumite.
Clasificatorio para o estatal de Karate
A competición que acolle este domingo a cidade herculina ten importancia rexional, por se campionato autonómico, pero tamén estatal xa que conta con carácter clasificatorio para o Campionato de España Absoluto e de Para-Karate e para o Campionato de España de Clubs da modalidade. Permitirase o acceso de público ás gradas conforme a normativa vixente, sendo a entrada de balde.