Os concellos de A Coruña, Arteixo e Culleredo veñen de obter unha subvención autonómica de 342.000 euros que financiará a metade do investimento necesario para acondicionar a zona deportiva en Montegolf. Trátase dun espazo limítrofe cos tres municipios e onde as partes implicadas acordaron facer unha inversión de 642.000 euros para a creación dunha zona deportiva que atenda as necesidades dos veciños dos tres concellos que viven nas inmediacións.
Neste sentido, a Xunta de Galicia, a través da Fondo de Cooperación Local, resolveu asignarlle aos concellos de A Coruña, Arteixo e Culleredo unha achega de 342.361,65 euros para contribuír á rehabilitación e modernización do complexo deportivo de Montegolf. O orzamento do proxecto ascende a un total de 684.723,30 euros, e os concellos da Coruña, Arteixo e Culleredoachegarán a metade do investimento previsto.
O complexo dará servizo aos tres concellos
Os tres municipios están a cooperar para coordinarse na rehabilitación e ampliación do complexo deportivo Montegolf. Aínda que ubicado no termo municipal de Arteixo, o espazo deportivo, na Zapateira, linda tamén cos outros dous municipios implicados, aos que tamén dará servizo.
O complexo deportivo Montegolf foi cedido ao Concello de Arteixo pola empresa Riofisa tras un acordo destinado a resolver o abandono de unha instalación privada que foi afectada pola crise do 2008. Co novo proxecto, aumentará os servizos previstos inicialmente tras un acordo ao que teñen chegado os concellos da Coruña, Arteixo e Culleredo, para crear unha gran zona deportiva en este lugar limítrofe entre os tres e que polo tanto dará servizo aos veciños dos tres concellos que viven a escasos metros uns de outros.
A implicación dos tres concellos, con aportacións económicas de cada un deles, permitirá ampliar o complexo e mellorar a proposta inicial para dita superficie.
O complexo deportivo contará cun edificio principal con vestiarios, aseos, espazos polivalentes e zonas exteriores verdes nas que se integrarán varias pistas deportivas e unha piscina ao aire libre.
As actuacións previstas centraranse en obras de rehabilitación, reparación, ampliación e modernización do equipamiento, substituíndo, as actuais pistas de pádel por pistas multideporte que favorezan as actividades de dinamización e práctica de distintas disciplinas, devolvendo a funcionalidade ao complexo e aumentando os servizos previstos inicialmente.
Salientan a colaboración entre concellos na rehabilitación de Montegolf
“Este proxecto é un bo exemplo de coordinación entre concellos para ter un equipamento deportivo compartido e que sexa útil aos cidadáns na Coruña e área de influencia. Os veciños e veciñas non entenden de fronteiras administrativas entre concellos, e nós como Goberno municipal vemos útil entendernos cos concellos limítrofes porque a Gran Coruña constrúese con cooperación e diálogo”, indicou José Manuel Lage, concelleiro de Economía e Planificación Estratéxica do Concello da Coruña.
José Manuel Lage: “Este proxecto é un bo exemplo de coordinación entre concellos para ter un equipamento deportivo compartido”
Pola súa banda, o alcalde de Arteixo, Carlos Calvelo, sinalou que “a colaboración entre varios concellos permitirá optimizar os servizos que se ofrezan nesta zona deportiva e que exista na instalación unha oferta de ocio máis completa da prevista inicialmente”.
Carlos Calvelo: “a colaboración entre varios concellos permitirá optimizar os servizos que se ofrezan nesta zona deportiva e que exista na instalación unha oferta de ocio máis completa da prevista inicialmente”.
Ademais, o alcalde de Culleredo, José Ramón Rioboo, apuntou que a suma de esforzos entre os tres concellos e a Xunta permitirá ofrecer á cidadanía unhas infraestruturas deportivas modernas ao carón da súa vivenda. Resaltou que os tres municipios veranse beneficiados do que é un exemplo de cooperación institucional.
José Ramón Rioboo: “A suma de esforzos entre os tres concellos e a Xunta permitirá ofrecer á cidadanía unhas infraestruturas deportivas modernas ao carón da súa vivenda”
