A Coruña acollerá o próximo 6 de xuño o Campionato de España Individual e de Seleccións Autonómicas de Marcha Nórdica “III Trofeo Cidade da Coruña”, que se celebrará na contorna da Torre de Hércules baixo estritas medidas de seguridade.
De momento, xa confirmaron a súa presenza na proba representantes e equipos procedentes de oito comunidades autónomas. A xornada deportiva comezará ás 09.45 horas e consistirá nun circuíto de aproximadamente 14 quilómetros polo parque escultórico da Torre de Hércules.
A cidade, que viu nacer en 2017 as competicións oficiais de marcha nórdica, foi pioneira ao organizar un evento oficial cando apenas se practicaba. Deste entón, A Coruña volveu estar presente no calendario competitivo dous anos despois e foi sede dunha das probas da Copa de España e o I Campionato Galego de Marcha Nórdica.
Este ano, a cidade galega será anfitrioa do evento máis importante, o que a consolida como referente na promoción dunha modalidade deportiva, a marcha nórdica, que entra dentro da programación das escolas municipais do Concello da Coruña, xunto a outras como adestramento intenso e moi intenso, bádminton, espalda sa, Ioga e xogos predeportivos.
O 86% das federadas no Club de Marcha Nórdica A Coruña son mulleres
Fomentar a práctica do deporte é unha das máximas do Goberno de Inés Rey, que entende que acollendo citas como a de xuño estase incentivando a práctica e afección por este deporte que na Coruña goza dunha bagaxe importante e unha ampla presenza feminina. Proba disto é que o 86% das deportistas federadas do Club de Marcha Nórdica A Coruña son mulleres.
Esta proba de alto nivel está organizada pola FEDME (Federación española de Deportes de Montaña e Escalada), a Federación Galega de Montañismo e o Club Marcha Nórdica A Coruña. Polas estritas medidas de seguridade e o cumprimento do protocolo de prevención da COVID-19, a participación estará limitada a deportistas federadas/os con licenza FEDME.
Máis información en www.trofeomarchanordicacoruna.es
A marcha nórdica, nova terapia para as mulleres con cancro de mama
