A Copa Princesa volverá abrir o curso en 2023 cun torneo que do 6 ao 8 de xaneiro terá unha sede inédita: A Coruña. O CV Autos Cancela Zalaeta será o anfitrión dunha competición copeira que xuntará na cidade herculina no arranque de 2023 aos mellores equipos da Superliga Feminina 2 (SLF2) á procura de levantar o trofeo no torneo do KO.
A 16ª edición do torneo do KO da Superliga Feminina 2 repite formato de competición con seis equipos participantes e co CV Autos Cancela Zalaeta exercendo de anfitrión dunha cita deportiva que aínda deberá esperar para coñecer a súa definitiva relación de aspirantes.
Os dous mellores conxuntos de cada grupo que compoñen a Superliga Feminina 2 pelexarán por suceder no palmarés a CV Gran Canaria, vencedor das dúas últimas edicións da Copa Princesa disputadas no Centro Insular de Deportes.
A Coruña estréase como sede da Copa Princesa
A cidade da Coruña estrearase como sede desta competición copeira, que terá a súa estrea o venres dando comezo a tres intensos días de competición, que arrincarán cos primeiros encontros da fase de grupos, para definir o nome dos semifinalistas na mañá do sábado, segundo informa a Real Federación Española de Voleibol. A tarde do sábado definirá a final que protagonizarán os dous vencedores das semifinais da Copa Princesa, que disputarán o domingo o choque polo título do torneo do KO da categoría de prata do voleibol feminino estatal.
