Este sábado A Coruña volverá situarse no mapa nacional da náutica coa II edición da Regata de Dragóns, que se desenvolverá en horario de mañá nas augas do dique de abrigo e co castelo de San Antón como punto de saída.
Na práctica desta modalidade deportiva de remo en Galicia son pioneiras as mulleres que teñen padecido ou padecen cancro de mama. Os beneficios desta actividade física, tanto no corpo como na mente diante desta doenza, fixeron que se crearan entre mulleres con cancro de mama colectivos de adestratamento, e posteriormente de competición, na modalidade de Barco Dragón. O colectivo Bolboretas Coruña son un exemplo desas pioneiras.
Este é o segundo evento deportivo integrado no Nautical Festival tras acoller, a pasada fin de semana, o Trofeo Cidade da Coruña de Vela Feminina organizado polo Real Club Náutico da cidade no que competiron ata oito tripulacións femininas de diferentes puntos de España.
O concelleiro de Cultura e Turismo, Gonzalo Castro, participou esta tarde no acto de presentación da Regata de Dragóns destacando o apoio do Concello da Coruña á “celebración dunha proba deportiva desta magnitude na Coruña que ademais é unha oportunidade única para demostrar que turismo e deporte son unha parella perfecta, sobre todo cando a través do deporte é posible mostrar o noso patrimonio histórico e arquitectónico”.
🚣♂️ A Coruña acolle este sábado a Regata de Dragóns, enmarcada no Nautical Festival 2025
👉 O concelleiro de Cultura e Turismo acudiu hoxe á presentación sinalando o apoio deste tipo de eventos á “desestacionalización” turística
ℹ️ https://t.co/m2D6ZxYQRV pic.twitter.com/KQc7C1aw6J
— Concello da Coruña (@ConcelloCoruna) October 24, 2025
O edil tamén sinalou o impacto positivo deste tipo de turismo que “nos permite desestacionalizar o sector e potencialo en épocas máis complicadas”.
Na presentación tamén estiveron presentes o concelleiro de Deportes, Manuel Vázquez; e unha representación das tripulacións dos clubs de Dragóns da Coruña: Bolboretas e Auga, que participarán nas diferentes competicións esta fin de semana.
O Barco Dragón, o deporte como terapia ante o cancro
Destaca nesta segunda edición de Regata de Dragóns a categoría BCS (as siglas en inglés de Breast Cancer Survivors), aquela na que as súas tripulantes usaron este deporte como terapia na loita contra o cancro fortalencendo o seu sistema inmunitario, disminuíndo a fatiga e axudándolles na recuperación da enfermidade a nivel físico e mental.
Ver esta publicación en Instagram
Eventos programados para novembro
O deporte náutico será de novo protagonista en novembro cunha exhibición de esquí náutico, wakeboard, wakesurf e vela. Neste último caso, terá lugar o Trofeo Aurelio Fernández Lage de Optimist.
