O Grand Prix Series 7s Copa da Raíña Iberdrola chega á Coruña. O torneo celebrarase no estadio de Elviña os vindeiros días 19 e 20 de xuño, e reunirá aos 12 mellores clubs de España, entre eles o galego CRAT Residencia Rialta.
A Federación Galega de Rugby e a Federación Española de Rugby organizan conxuntamente este campionato, en colaboración coa Xunta de Galicia e o Concello da Coruña.
A cidade galega será a primeira sede do torneo. Este divídese en tres grupos, dos cales o CRAT é o cabeza de serie no B. As coruñesa competirán co Club Rugby Cisneros, o Olímpico de Pozuelo e o León Rugby Club.
No A quedan encadrados o CR Majadahonda, o CR Sant Cugat, o Rugby Turia e o Eibar Rugby Taldea. Pola súa parte, o C está conformado polo XV Hortaleza RC, o Sanse Scrum Rugby, o UAS Universitario de Sevilla CR e o AD Ingenieros Industriales Las Rozas Rugby.
O Challenge 7s Copa da Raíña Iberdrola será en Culleredo
Ademais, tamén na vindeira fin de semana celebrarase en terras galegas o Challenge 7s Copa da Raíña Iberdrola. Esta competición coroará ao equipo campión da segunda categoría, o cal ascenderá á Copa da Raíña na seguinte tempada. Esta competición terá lugar no campo de Acea da Ma en Culleredo.
Os equipos participantes serán o Jabatos Móstoles Rugby Club, Pingüinas Rugby Burgos, CP Les Abelles, Getxo Rugby, Club Deportivo Arquitectura, Shamrock Rugby Club e Valladolid Rugby Asociación Club.
As dúas competicións retransmitiranse vía streaming a través da canle de Youtube da Federación Galega de Rugby.
