A cidade da Coruña será, durante esta fin de semana, a capital nacional do karate. O Palacio dos Deportes de Riazor acolle as competicións asociadas á final da Liga Nacional de Karate e a Liga Iberdrola, nas que tomarán parte case 900 deportistas que representan a 144 clubes de toda España. Entre eles, 17 karatekas galegos pertencentes a oito entidades do territorio.
O campionato, presentado esta mañá no Palacio dos Deportes de Riazor, comezou este venres (15.00 horas), coas categorías infantís femininas ata a categoría Sub-21. Xa este sábado 17, pola mañá, será o turno da Liga Iberdrola Senior, en categoría feminina, e, pola tarde, darán comezo as categorías infantís masculinas ata a Sub-21. O peche do evento terá lugar o domingo pola mañá, coa posta en marcha das competicións na categoría senior masculina.
Nomes propios do karate feminino internacional
Grandes campións e campioas a nivel internacional, como Paola García Lozano e Mireia Bejarano, subcampioas do Mundo en categorías cadete e junior, así como María Torres, campioa do Mundo en kumite senior, e Babacar Seck, bronce mundial, competirán nesta cita que acolle a cidade.
Todo o campionato será retransmitido por streaming, a través da canle de YouTube da Real Federación Española de Karate, e as finais senior poderán visualizarse na canle de LaLigaSports TV, tanto o sábado como o domingo, ás 11.00 horas.
Á presentación desta cita deportiva asistiu a concelleira de Deportes do Concello da Coruña, Mónica Martínez, que estivo acompañada polo presidente da Federación Gallega de Karate, Óscar Lafuente López e polo presidente da Real Federación Española de Karate, Antonio Moreno Marqueño.
A final da Liga Nacional desta disciplina é a antesala da Youth League, que terá lugar na cidade da Coruña a finais de abril e na que tomarán parte máis de 3.000 deportistas.
