Na fin de semana do 12 e 13 de decembro, o Polideportivo do Club del Mar de San Amaro de A Coruña convertirase no escenario que acolla o máis alto nivel estatal de halterofilia, nunha nova edición do Campionato de España por clubs feminino – XXIV Copa S.M. a Raíña. Nel competirán ata oito galegas do CH Coruña e do CH Pabellón. Ademais, tamén se celebra a Copa del Rey masculina.
En cada competición participarán ata 12 equipos, de entre os clasificados dos 18 participantes do play off de Liga Nacional Absoluta. Así, pola parte feminina, o CH Coruña chega en primeira posición, acumulando 866,13 puntos. No cuarto posto, están as ourensás do CH Pabellón, con 775,05 puntos.
O listado completo de clubs participantes pódese consultar nesta ligazón.
Os horarios pódense consultar na web da Federación Española.
As Irenes do Coruña e as Evas do Pabellón, halteras participantes desta edición
As halteras galegas competirán o domingo desde as 08:20 horas coa mente posta no podio. Os principais rivais que teñen por diante son a Escuela Tinerfeña de Halterofilia e o club Elemental.
Segundo informa a Federación Galega de Halterofilia, por parte do equipo coruñés, o máis probable é que compitan Ruth Fuentefría, Noelia García, Irene Martínez e Irene Blanco. Este equipo quere repetir lugar entre as mellores, proclamándose campión como xa fixo noutras ocasións.
Por outra banda, a aliñación máis probable do cadro ourensán estará formada por Ana Argenti, Andrea Montes, Eva Carrera e Eva Fernández.
Por parte masculina, competirán desde o CH Coruña, Michael Otero, José Martínez, Víctor Castro, Martín Liste, David Mata e Carlos Castro. O club herculino é o vixente campión, ao lograr o ouro no trofeo de Alcalá de Henares 2019.
